Бугун "Пахтакор" ОЧЛ финалига йўл олиши мумкин

Сарлавҳани ўқибоқ муаллифнинг футбол ҳақидаги билимларини шубҳа остига олишга шошилманг. 

Ҳа, бугун "Пахтакор" Осиё чемпионлар лигаси чорак финалида ўйнайди. Ҳа, бугун Тошкентнинг жамоаси форслар устидан ғалаба қозонган тақдирда ҳам ярим финалда Саудия клубларидан бирига тўқнаш келади. 

ОФК ҳали мусобақа форматига ўзгартириш киритгани йўқ. Чорак финалдаги ғалаба финалгайўлланма бермайди. 

Лекин! Бугун "Пахтакор" Ғарбий минтақада плей-оффда иштирок этаётган 3та жамоанинг энг кучлисига қарши майдонга тушади. "Ан-Насср" ва "Ал-Аҳли"га ҳурмат сақлаган ҳолда айтиш керакки, "Персеполис" айни пайтда хавфлироқ жамоа. Тўғри, бундай босқичларда кучсиз жамоаларнинг ўзи бўлмайди, ҳар бир жамоадан хавф кутиш керак, "ва ҳоказо, ва ҳоказо" каби фикрларни билдириш мумкин. 

Лекин Эйнштейннинг нисбийлик назариясини қўллаган ҳолда айтадиган бўлсак, барибир "Персеполис" нисбатан кучли жамоа. Таркибида Эрон миллий терма жамоасининг бир қатор футболчилари тўп сурадиган клубга қарши тушишни кўпчилик футбол мухлислари истамаётганди. Қуръанинг кўзи кўр деганларидек, "Пахтакор"га яна бир бор Эрон жамоаси тушмоқда.

Гуруҳнинг сўнгги ўйинида ҳам, нимчорак финалда ҳам Эрон клубларини мусобақадан чиқариб юборди жамоамиз. Энди "Персеполис" уларнинг аламини олиш учун ҳам икки карра иштиёқ билан тўп суради. Тўғри, бу жамоада ҳам муаммолар бор. Пандемия ҳамма жамоага бирдек таъсир кўрсатган. Ҳар уч кунда ўйин ўтказиш анча куч талаб қилмоқда. Футболчилар жисмоний жиҳатдан толиқиб қолишяпти. Агар бугун "Пахтакор" ғалаба қозонадиган бўлса, у ёғи осон кечади. "Персеполис"ни ютган жамоа "Ан-Наср" ёки "Ал-Аҳли"дан ўтишига шахсан мен ишонаман. Сиз-чи?

ОЧЛ. 1/4 финал
Соат 22:45.Доҳа, "Жассим Бин Ҳамад"
"Персеполис" - "Пахтакор"

"Пахтакорга" ўйиндан олдин тилакларим: Совуққонлик!  Ирода! Ўз кучига ишонч!Ҳа, айтганча, яна — Омад! Умид қиламизки, бугун Омад ҳам "Пахтакор" либосида майдонга тушади!

Ёқубжон Бобожонов