Таниқли россиялик шарҳловчи Александр Шмурнов "Эл класико"ни FUTBOL TV телеканалида шарҳлайди

Хабарингиз бор, 1 март куни Испания чемпионатидан ўрин олган учрашувда навбатдаги "Эл класико" — "Реал"-"Барселона" ўйини бўлиб ўтади.

Мазкур ўйин FUTBOL TV телеканали орқали соат 01:00дан бошлаб жонли эфирда намойиш қилинади. Ўйинга бўлган катта қизиқишни эътиборга олган ҳолда, учрашув параллел равишда икки тилда — ўзбек ва рус тилларида шарҳлаб борилади. Ўйинни ўзбек тилида Даврон Файзиев шарҳласа, рус тилида шарҳлаб бориш учун таниқли россиялик шарҳловчи Александр Шмурнов таклиф қилинди.

Александр Шмурнов - Россия телеканалларидаги энг ўқимишли спорт шарҳловчиларидан бири. У "Спорт журналистикаси маркази" мактабини ташкил этган бўлиб, мазур мактаб битирувчилари бугунги кунда "Матч ТВ", "Евроспорт", "Спорт-Экспресс" каби бир қатор етакчи спорт компанияларида фаолият олиб боришмоқда.

Александр Шмурнов дастлаб шу куни соат 23:00да FUTBOL TV телеканалида жонли эфирда намойиш қилинадиган FAN TIME кўрсатувида иштирок этади. Кўрсатувга ташриф буюрган мухлислар билан ташкил этиладиган суҳбат ва викториналарда қатнашади. Кейин эса ўйинни шарҳлаб бориш учун FUTBOL TV телеканалига йўл олади.

Маълумот учун, бу Шмурновнинг юртимизга биринчи ташрифи эмас. Бундан аввал Александр Иванович 2015 йил сентябрь ойида UZREPORT TV телеканали таклифига кўра Тошкентга ташриф буюрган бўлиб, ўшанда у Европа Чемпионлар лигасидан ўрин олган "Реал" Мадрид - "Шахтёр", "Барселона" - "Рома" ва "Порту" - "Челси" учрашувларини UZREPORT TV телеканали мухлислари учун шарҳлаб борганди.

FAN TIME кўрсатувида иштирок этмоқчи бўлган футбол мухлислари қуйидаги телефон рақамига мурожаат қилишлари мумкин: +(99890) 903-31-36.