Ўзбекистон МТЖ ўз майдонида Саудия Арабистонига ютқазди

Бугун Ўзбекистон миллий терма жамоаси ЖЧ-2022 саралашидан ўрин олган учрашувда Саудия Арабистонига қарши майдонга тушди.

Ўйинда биринчи бўлиб биз ҳисобни очдик. 16-дақиқада Элдор Шомуродов рақибни хатосидан унумли фойдаланиб, гол киритди. Аммо кейин 23-дақиқада Саудия Арабистони терма жамоаси пенальтидан гол киритиб, ҳисобни тенглаштирди. Биринчи бўлим 1:1 ҳисобидаги дуранг билан якунига етди.

 Иккинчи бўлимда вакилларимиз яна ҳужумга ўтишди. 56-дақиқада рақиб футболчиси ўз жарима майдончаси ичида тўпни қўли билан ўйнагани учун ҳакам пенальти белгилади. Отабек Шукуров 11-метрлик нуқтадан зарба беришда адашмади. Кўринишидан терма жамоамиз бу ўйинда ғалаба қозонадигандек эди. Аммо сўнгги дақиқаларда футболчиларимизнинг жисмонан чарчаб қолиши бизга панда берди. 85-дақиқада Салмон Фараж, 90-дақиқада эса Салим Ал-Довсари гол киритиб, Саудия Арабистонининг ғалабасини таъминлашди.

Бу ўйиндаги ғалабадан кейин Саудия Арабистони гуруҳда пешқадамга айланди. Ўзбекистон терма жамоаси эса иккинчи поғонага тушиб қолди.

ЖЧ-2022 саралаши
Ўзбекистон - Саудия Арабистони 2:3
Голлар: Элдор Шомуродов (16), Отабек Шукуров (56, пен.) - Салман Ал Фараж (23 пен., 85), Салим Ал Довсари (90)
Ўзбекистон МТЖ: 1.Элдорбек Суюнов - 3.Ҳожиакбар Алижонов, 9.Одил Аҳмедов, 5.Рустам Ашурматов, 4.Фарруҳ Сайфиев - 8.Икром Алибоев, 7.Отабек Шукуров, 13.Санжар Қодирқулов - 10.Жалолиддин Машарипов, 17.Достонбек Ҳамдамов, 14.Элдор Шомуродов.
Саудия Арабистони МТЖ: 21.Муҳаммад Ал Овайс, 13.Ёсир Ал Шаҳрони, 4.Зиёд Ал Саҳафи, 5.Муҳаммад Хубрани, 6.Муҳаммад Ал Бурайк, 7.Салмон Ал Фараж, 8.Яҳё Ал Шеҳри, 11.Хаттан Баҳбри, 14.Абдуллоҳ Отайф, 17.Фирас Ал Бурайкан, 18.Салим Ал Давсари.