27-fevral kuni O‘zbekistonda sodir bo‘lgan muhim voqealar dayjesti

Andijondagi “Jahon bozori”da yong‘in chiqdi

Yong‘in oqibatida savdo do‘konining 80 metr kvadrat maydonida shift tom qismi va savdo do‘koni ichidagi buyumlar zararlangan.

Fuqarolarning vijdon erkinligini taʼminlash va diniy sohadagi davlat siyosati konsepsiyasi tasdiqlandi

Konsepsiya vijdon erkinligiga bo‘lgan huquqni va O‘zbekiston dunyoviy davlat ekanligiga oid konstitutsiyaviy qoidalarni ro‘yobga chiqarish hamda diniy sohadagi davlat siyosatining maqsadi, vazifalari, prinsiplarini va ustuvor yo‘nalishlarini belgilaydi.

Ufuk Ulutash Turkiyaning O‘zbekistondagi elchisi etib tayinlandi

Yangi tayinlangan elchi Ufuk Ulutash O‘zbekiston TIV vaziriga ishonch yorliqlarini topshirdi.

Toshkentdagi xususiy bog‘chalarning birida tarbiyachilar bolalarga qo‘pol munosabatda bo‘lib, ularni urgani aniqlandi

Maktabgacha ta’lim muassasasi ma’muriyati tomonidan 3 nafar tarbiyachi bilan tuzilgan mehnat shartnomasi bekor qilingan. Hozirda bolalarga nisbatan tan jarohati yetkazilganlik holatini aniqlash maqsadida sudga oid tibbiy ekspertiza tayinlangan.

Velosportchilarimiz Osiyo chempionatida 3 ta oltin va 5 ta bronza medalga sazovor bo‘lishdi

Malayziyada velosportning trek yo‘nalishi bo‘yicha yoshlar va kattalar o‘rtasidagi Osiyo chempionati o‘z yakuniga yetdi. Unda sportchilarimiz yuqori natijalarni qayd etib, 3 ta oltin va 5 ta bronza medallariga sazovor bo‘lishdi.

Rossiyadagi patent imtihonlariga tayyorgarlik ko‘rish platformasi ishga tushirildi

Migratsiya agentligi Rossiyada vaqtincha ishlash uchun ruxsatnoma olishga tayyorlovchi platformani ishga tushirdi.

SSV: O'zbekistonda mavsumiy respirator kasalliklar tarqalishi bilan bog‘liq vaziyat barqaror

Ijtimoiy tarmoqlarda O'zbekiston bo‘ylab o‘tkir respirator virusli infeksiyalar avj olgani, ayniqsa, maktab va bog‘chalarda kasallik keng tarqalgani, oqibatda poliklinikalar emlanmagan bemor bolalar bilan to‘lgani haqida xabarlar tarqalmoqda. Vaziyat yuzasidan Sanitariya-epidemiologik osoyishtalik va jamoat salomatligi qo‘mitasi raisining birinchi o‘rinbosari Nurmat Atabekov ma'lumot berdi.

O‘zbekistonda “Temu” marketpleysi bloklanishi mumkin

ILMA direktorining birinchi o‘rinbosari Vyacheslav Pak xorijiy marketpleyslarning noqonuniy faoliyati O‘zbekiston iqtisodiyotiga zarar yetkazayotganini ta’kidladi. Mahalliy bozorga tovarlar yetkazib berishda soliqlar va bojxona to‘lovlari to‘lanmaydi, yuk tashish va to‘lovlar uchinchi tomon kompaniyalari tomonidan amalga oshiriladi, shuningdek, 2024-yilda faqat “Temu” bo‘yicha hajmi $10 mlndan oshgan valyuta chiqib ketishi sodir bo‘lmoqda. “Yo ular O‘zbekistonda faoliyatini qonuniylashtirib, bu yerda sho‘ba korxonasini ochadi, yo soliq hisobiga turib, QQS to‘lovchisiga aylanadi”, — dedi Pak.

O‘zbekiston davlat qarzi 40 mlrd dollardan oshdi

Davlat kafolati ostida olingan kreditlarning 33,7 milliard dollari (84 foizi) tashqi qarz bo‘lib, shundan 17,9 milliard dollari qatʼiy belgilangan foiz stavkada jalb qilingan.

Endi bog‘cha tarbiyachilari ham vazir jamg‘armasidan ustama olishi mumkin

Endilikda vazir jamg‘armasidan har oylik ustama olish uchun nomzodlar ro‘yxati avvalgidek hududiy kengashlar tavsiyasi asosida shakllantirilmaydi. Sinovlarda barcha fan o‘qituvchilari ishtirok etishi mumkin.

Rossiyada ota-ona qaramog‘isiz qolgan ikki bola O‘zbekistonga olib kelindi

Ular politsiya tomonidan o‘tkazilgan reyd davomida Voyaga yetmagan huquqbuzarlarni vaqtincha saqlash markaziga yuborilgan.

“Nukus-Beyneu-Nukus” yoʻnalishi boʻyicha xalqaro yoʻlovchi poyezdi qatnovi yo'lga qo'yiladi

28-fevral sanasidan boshlab haftada 2 marotaba dushanba va juma kunlari “Nukus-Beyneu-Nukus” yoʻnalishi boʻyicha 651/652-sonli yangi xalqaro yoʻlovchi poyezdi qatnovi amalga oshiriladi.

Endi taʼlim tili oʻzbek tili boʻlmagan sinf bitiruvchilari ham davlat tilidan imtihon topshiradi

2025-yilidan boshlab taʼlim o‘zbek tilida olib borilmaydigan umumiy o‘rta ta’lim muassasalarining 11-sinf bitiruvchilari uchun ham Davlat tilidan yakuniy nazorat imtihonlarini topshirish majburiy bo‘lishi belgilanmoqda.