Tramp: Ukraina NATO aʼzoligini unutishi kerak

AQSh prezidenti Donald Tramp Qo‘shma Shtatlar Ukrainaga qo‘shimcha xavfsizlik kafolatlarini taklif qilmasligini aytdi. “Men o‘zimizda bo‘lganidan ortiq xavfsizlik kafolatlarini bermayman, biz buni Yevropaga ishonib topshiramiz. Lekin biz, albatta, hammasi yaxshi bo‘lishiga ishonch hosil qilamiz”, — dedi Tramp 26-fevral, chorshanba kuni AQSh Vazirlar Mahkamasining birinchi yig‘ilishida. Vashington, xususan, Yevropa tinchlikparvar kuchlari Ukrainaga joylashtirilsa, Yevropani qo‘llab-quvvatlashi mumkin.

Oq uy rahbari Ukrainadagi urushni to‘xtata olishiga ishonch bildirdi. Uning aytishicha, Rossiya tomoni tinchlikka erishish uchun muzokaralarda yon berishga majbur bo‘ladi. "Biz ikkala tomon uchun ham foydali kelishuvga erishish uchun qo'limizdan kelganini qilamiz", dedi Amerika rahbari jurnalistlar bilan suhbat chog'ida. Tramp kelishuv “Ukraina uchun foydali bo‘lishini” ta’minlashga harakat qilishiga ishontirdi. Uning so‘zlariga ko‘ra, AQSh Ukrainaga yo‘qotilgan hududlarning bir qismini qaytarib olishda yordam berishga harakat qiladi, garchi bu qiyin bo‘lsa-da.

Biroq, AQSh prezidenti Ukraina "NATO haqida unutishi" kerakligini ta'kidladi. Uning fikricha, urush aynan Ukrainaning Shimoliy Atlantika alyansiga a'zoligi masalasi tufayli boshlangan.

Tramp Zelenskiyning Vashingtonga tashrifini tasdiqladi

Tramp Ukraina prezidenti Vladimir Zelenskiy 28-fevral kuni Vashingtonga “noyob yer va boshqa materiallar”ni o‘zlashtirish bo‘yicha kelishuv imzolash uchun kelishini tasdiqladi. AQSh prezidentining fikricha, kelishuv Jo Bayden ma'muriyati Ukrainaga yuborgan barcha harbiy yordamni qoplashga yordam beradi va shu bilan birga ko'proq foyda keltirishi mumkin. Trampning taʼkidlashicha, Qoʻshma Shtatlar Kiyevga koʻrsatgan yordami uchun Vashington “kelajakda katta pul” olishini koʻrsatuvchi “kelishuvga erisha oldi”.

Oldinroq Zelenskiy Vashingtonda imzolanishi rejalashtirilgan doiraviy kelishuv haqida gapirar ekan, unda Ukrainaning AQShga ko‘rsatilgan harbiy yordam uchun qarzi haqida hech narsa aytilmaganini ma’lum qilgandi. Bundan tashqari, Ukraina rahbarining so‘zlariga ko‘ra, kelishuvda “AQSh hukumati Ukrainaning uzoq muddatli tinchlikka erishish uchun zarur bo‘lgan xavfsizlik kafolatlarini olishga qaratilgan sa’y-harakatlarini qo‘llab-quvvatlashi” qayd etiladi.