Ўзбекистонда хорижий компаниялар сони 20 мингтага яқинлашди

1 май ҳолатига кўра, Ўзбекистонда хорижий инвестициялар иштирокида 19 490 та компания фаолият юритмоқда. 

Йил бошидан буён ўтган тўрт ой ичида уларнинг сони 1326 тага ёки 7,3% га кўпайди. Йиллик ҳисобда ўсиш қарийб 3,5 мингта компанияни (+21,7%) ташкил қилди.

Корхоналарнинг асосий қисми тўлиғича хорижий таъсисчиларга тегишли — ҳозирда бундай компаниялар 15063 тани (+26%) ташкил этмоқда. Шу билан бирга, қўшма корхоналар сони ҳам босқичма-босқич ўсишда давом этиб, май ойи бошига келиб 4427 тага етди.

Хитой бошқа давлатлардан илгарилаб боришда давом этмоқда. Айни пайтда мамлакатда хитойлик инвесторлар иштирокида 5615 та компания фаолият юритмоқда — бу йил бошига нисбатан 571 тага ва ўтган йилнинг май ойига қараганда 1735 тага (44,7%) кўп.

Таққослаш учун, Россия сармояси иштирокидаги фирмалар сони бир йил ичида атиги 8,4% га ўсиб, 3308 тага етган. Шунга қарамай, Россия қўшма корхоналар сони бўйича етакчиликни сақлаб қолмоқда — Хитойда бу кўрсаткич 788 та бўлса, Россияда 909 тани ташкил этади.

Кучли учликдан Туркия ҳам ўрин олган — 2216 та фирма. Бу январь ойидаги даражадан 79 тага ва ўтган йилги кўрсаткичдан 252 тага (+12,8%) кўпдир. Қозоғистон ҳам шунга ўхшаш ўсиш суръатини намойиш этди — бир йилда 13% га ўсиш билан компаниялар сони 1259 тага етди.

Жанубий Корея капитали иштирокидаги компаниялар сони 721 тани ташкил этиб, ўтган йилнинг май ойидаги даражадан 8,4% га, йил бошидагидан эса 4% га ошди. Олтинчи ўринни 656 та фирма (-3%) билан Афғонистон эгаллаган бўлса, еттинчи ўринга 452 та компания билан Озарбайжон жойлашди — бу ўтган йилгига нисбатан 62,6% га кўп.

Шунингдек, ўнталикка 437 та фирма (+27,4%) билан Тожикистон, 427 та компания (+21,3%) билан БАА ва 405 та фирма (+26,5%) билан Ҳиндистон кирди. Аввалроқ ўнинчи ўринни эгаллаб турган АҚШ 356 та фирма билан 12-поғонага тушиб кетди — бу Қирғизистонга қараганда тўрттага кам.

Хорижий инвесторларни қизиқтираётган соҳалар орасида савдо етакчилик қилишда давом этмоқда — қарийб 7 мингта компания. Яна 3,86 мингта фирма саноат, 1598 таси қурилиш ва 1536 таси ИТ соҳасида фаолият юритади.