O‘zbekiston Prezidenti Lev Tolstoy nomidagi Xalqaro tinchlik mukofotiga nomzod etib ko‘rsatildi

“Rossiya tinchlik fondi” xalqaro jamoat fondi Oʻzbekiston Prezidenti Shavkat Mirziyoyev, Qirgʻiziston Prezidenti Sadir Japarov va Tojikiston rahbari Imomali Rahmonni xalqaro huquq ustuvorligi asosida umumbashariy va teng xavfsizlikni taʼminlash, koʻp qutbli dunyo barpo etish, xalqlar oʻrtasida oʻzaro tushunish va hamkorlikni mustahkamlashga qoʻshgan katta hissasi uchun Lev Tolstoy nomidagi xalqaro tinchlik mukofotiga nomzodini ilgari surdi. Bu haqda jamg‘arma boshqaruvi raisi, Davlat dumasi xalqaro ishlar qo‘mitasi rahbari Leonid Slutskiyning mukofot hakamlar hay’atiga yo‘llagan maktubida aytiladi.

Murojaatnomasida u 2025-yil 31-mart kuni Xo‘jandda bo‘lib o‘tgan uch davlat rahbarlarining birinchi sammitida tarixiy kelishuvlar – O‘zbekiston, Qirg‘iziston va Tojikiston chegaralarining tutash nuqtasi to‘g‘risidagi bitim va “Abadiy do‘stlik to‘g‘risida”gi Xo‘jand deklaratsiyasi imzolanganini ta’kidladi, bu esa xalqaro barqarorlik, butun mintaqa barqarorligi va barqaror rivojlanishi maqsadlarini ta’minlashga xizmat qiladi.

“Rossiya tinchlik fondi” xalqaro jamoat fondi ushbu muhim tarixiy voqeani nishonlash hamda koʻp qutbli dunyo barpo etish va xalqlar oʻrtasidagi oʻzaro tushunish va hamkorlikni mustahkamlashga qoʻshgan hissasi uchun Oʻzbekiston Respublikasi Prezidenti Shavkat Mirziyoyev, Qirgʻiziston Respublikasi Prezidenti Sadir Japarov va Tojikiston Respublikasi Prezidenti Imomali Rahmonni Lev Tolstoy nomidagi xalqaro tinchlik mukofotiga nomzod qilib koʻrsatishni taklif etadi.

U mazkur davlatlar rahbarlarining sa’y-harakatlari bilan Yevroosiyo makonida xavfsizlik ta’minlanayotgani, Markaziy Osiyo davlatlari o‘rtasida vizasiz makon yaratish va mintaqaning turistik jozibadorligini oshirish g‘oyasi yuzasidan muloqot davom etayotganini alohida ta’kidladi.

Mukofot haqida

Lev Tolstoy nomidagi Xalqaro tinchlik mukofoti uchinchi jahon urushi xavfining oldini olishga qaratilgan faoliyatdagi yuksak xizmatlar, xalqaro huquq ustuvorligi asosida umumiy va teng xavfsizlikni ta’minlash, qurollanish poygasini to‘xtatish, ko‘p qutbli va zo‘ravonliksiz dunyo qurish, demilitarizatsiya, demokratlashtirish va gumanitar sohalardagi yutuqlar, tinchlikparvarlik faoliyati hamda inson huquq va erkinliklarini himoya qilishdagi ishtiroki uchun beriladi.

2024-yilda ushbu mukofot Afrika ittifoqiga topshirilgan edi. Hakamlar hay’ati BRIKS, SHHT va “Katta yigirmatalik”ka a’zo bo‘lgan to‘qqiz davlat fuqarolaridan iborat bo‘lib, ular orasida BMT Xavfsizlik Kengashining uch doimiy a’zosi ham bor.