Ўзбекистонда 1 апрелдан аҳоли ва тадбиркорлар учун электр энергиясига «яшил» тарифлар жорий этилади

Ўзбекистонда айрим тадбиркорларга “яшил тадбиркор” мақоми берилади. Бу ҳақда 7 февраль куни президент фармони билан қабул қилинган 2025 йил учун мўлжалланган давлат дастурида белгиланган.

2025 йилнинг 1 сентябридан бошлаб тадбиркорларни “яшил тадбиркор” сифатида эътироф этишга қаратилган платформа ишга туширилади.

Бу мақом қуйидаги йўналишларда белгиланган кўрсаткичларни бажарган тадбиркорларга берилади:

- кўкаламзорлаштириш, жумладан, корхонани “яшил белбоғ” билан ўраш, суғориш тизимларини ўрнатиш, томчилатиш, ёмғирлатиш ва контейнерли (қопли) суғориш тизимини жорий қилиш;

- энергия тежамкорлигини таъминлаш, жумладан, энергия тежовчи ускуналар ва технологияларни жорий қилиш;

- корхонанинг атроф-муҳитга таъсирини камайтириш, жумладан, экологик ҳуқуқбузарлик содир этмаслик, атмосферага ташламаларни онлайн мониторинг қилиш тизимини жорий этиш;

- ишлаб чиқаришга циркуляр иқтисодиётни жорий қилиш («7Р») тамойилини татбиқ этиш.

“Яшил тадбиркор” мақомини олган тадбиркорларга “Шаффоф қурилиш” платформасида устуворлик берилади, муайян муддат давомида экологик текширувлардан озод этилади, халқаро бозорларга чиқишда қўллаб-қувватланади. Шу билан бирга, барқарорлик рейтингида қўшимча балл берилади.

Бундан ташқари, ҳужжат билан аҳоли ва тадбиркорларнинг қайта тикланувчи энергия манбаларидан фойдаланишини рағбатлантириш белгиланмоқда.

Хусусан, жорий йилнинг 1 апрелидан бошлаб «яшил» тарифлар жорий қилиниб, чиқиндилар утилизацияси ҳисобига ҳамда шамол ва қуёш манбаларидан ишлаб чиқарилган электр энергиясига нисбатан татбиқ этилади.

Унинг доирасида тадбиркорлар томонидан чиқинди ва биогаз утилизацияси орқали, ташкилотларнинг ўз ҳудудларидаги шамол ва қуёш қурилмаларидан ишлаб чиқариладиган электр энергияси учун имтиёзли тарифлар белгиланади.

Шу билан бирга, аҳолининг қуёшдан олинган ва ўз эҳтиёжидан орттириб, давлатга сотадиган энергияси учун имтиёзли тариф амал қилади.