Litva mavsumiy ishlash uchun ruxsatnomalarni eng ko‘p O‘zbekiston fuqarolariga bermoqda

2025 yilning birinchi choragida Litva mavsumiy ishlash uchun ruxsatnomalarni eng ko‘p O‘zbekiston fuqarolariga taqdim etdi. Bu Litva Ijtimoiy taʼminot va mehnat vazirligi huzuridagi bandlik xizmati maʼlumotlarida aks etadi.

Qayd etilishicha, xizmat tomonidan so‘nggi 5 yil ichida eng ko‘p mavsumiy ruxsatnomalar berilgan (363 ta). Bu o‘tgan yilning shu davriga (122) nisbatan 2,8 barobar ko‘pdir. Guvohnomalarda erkaklarning ulushi 91 foiz, ayollarniki 9 foizdir.

Tahlil qilinayotgan davrda 15 ta davlatdan (o‘tgan yili 9 ta davlatdan) kelgan xorijliklarga mavsumiy ishlash uchun ruxsatnomalar berilgan. 2025 yilda mamlakatlar ro‘yxatiga Gruziya, Ukraina, Vyetnam, Filippin, Keniya, Misr va Moldova qo‘shildi.

Eng ko‘p patentlar O‘zbekiston (42 foiz), Tojikiston (34 foiz), Qirg‘iziston (6 foiz) fuqarolariga berilgan. O‘tgan yili ham aynan shu davrda ushbu mamlakatlar fuqarolariga eng ko‘p mavsumiy mehnat guvohnomalari berilgandi, deyiladi xizmat xabarida.

«Litva mehnat bozori bu yerga pul topish maqsadida vaqtinchalik ishlash uchun kelgan xorijliklar uchun tobora ko‘proq ochilmoqda. Mavsumiy ishga kelganlarning yarmidan ko‘pi (53 foizi) yo‘llarda ishlovchi xodim sifatida ish topgan, o‘tgan yili esa eng mashhur kasb oziq-ovqat mahsulotlarini qayta ishlovchi (80 foiz) bo‘lgandi», — deyiladi xizmat xabarida.

Eng mashhur kasblar orasida oshpazlar (14 foiz), go‘shtni qayta ishlovchilar (7 foiz), qulupnay yetishtiruvchilar va qurilish xodimlari (har biri 5 foizdan) bor. O‘tgan yilning shu davrida eng ko‘p ruxsatnomalar oziq-ovqat mahsulotlarini qayta ishlovchilar — 80 foizgacha, poliz ekinlari yetishtiruvchilar va oshpazlar (har biri 4 foizdan), oziq-ovqat mahsulotlarini qadoqlovchilar (3 foiz) sifatida ishlash niyatida bo‘lganlarga berilgan.

Mamlakatda 2025 yil 1 aprel holatiga ko‘ra 137 ta davlatdan kelgan 145,8 ming nafar xorijlik mehnat qilmoqda. Bunda eng ko‘p hissa Ukraina (47,5 ming), Belarus (47,3 ming), O‘zbekiston (9,1 ming) va Tojikiston (6,5 ming) davlatlariga to‘g‘ri kelgan.