Markaziy Osiyo va Yevropa Ittifoqi strategik sheriklarga aylanadi
Markaziy Osiyo davlatlari va Yevropa Ittifoqi o‘zaro munosabatlarni strategik sheriklik darajasiga olib chiqmoqchi. Bu ikki mintaqaning birinchi sammiti yakunlari bo‘yicha juma kuni qabul qilinadigan Samarqand deklaratsiyasida ko‘zda tutilgan, dedi O‘zbekiston prezidenti matbuot kotibi Sherzod Asadov bir kun avval bo‘lib o‘tgan brifingda.
«Deklaratsiya konstruktiv muloqotni kengaytiradi va barcha yo‘nalishlardagi hamkorlikka kuchli surʼat bag‘ishlaydi», — dedi Sherzod Asadov.
«Bu, bevosita, Markaziy Osiyo davlatlari rahbarlari va Yevropa Ittifoqi yetakchilarining yig‘ilishi. Unda iqtisodiy hamkorlikni mustahkamlash, transport sohasidagi o‘zaro bog‘liqlik, barqaror taraqqiyot va ekologiya, gumanitar hamkorlik kabi keng qamrovli masalalar muhokama qilinadi», — dedi davlat rahbari matbuot kotibi.
Muzokaralar yakunida delegatsiyalar rahbarlari Samarqand iqlim forumining yalpi sessiyasida ishtirok etadi. Asosiy eʼtibor ekologik tahdidlarga qarshi kurashish, bu boradagi xalqaro hamkorlikni mustahkamlashga qaratiladi.
.png "YouTube UZREPORT TV")
