Samarqand iqlim forumi O‘zbekistonning global siyosatdagi ishtirokini kuchaytirishga xizmat qiladi

Keyingi yillarda Samarqand nafaqat geosiyosiy, balki ekologik muloqotlar markaziga ham aylanmoqda. Shaharning tarixiy-simvolik yuzi, transport infratuzilmasi va nufuzli tadbirlarga mezbonlik tajribasi uni global tadbirlar uchun muhim joyga aylantirmoqda.

Xususan, 4-5 aprel kunlari Samarqand shahri yana bir muhim global tadbir – Iqlim o‘zgarishiga bag‘ishlangan xalqaro Samarqand forumiga mezbonlik qilmoqda. Ushbu forum nafaqat ekologik muammolarni muhokama qilish, balki ularga javoban aniq yechimlar, siyosiy va iqtisodiy strategiyalarni belgilashga qaratilgan xalqaro platforma sifatida ham muhim ahamiyat kasb etadi.

Sababi, bugungi kunda iqlim o‘zgarishi insoniyat oldida turgan eng jiddiy muammolardan biriga aylangan. Shu bois, bu forum nafaqat dolzarb, balki strategik ahamiyatga ham ega. Aytish mumkinki, Samarqand forumi Markaziy Osiyodagi ekologik muammolar, iqlim o‘zgarishi oqibatlari va ularga qarshi kurashish bo‘yicha mintaqaviy va global muloqotlarni mustahkamlashga xizmat qiladi.

 Markaziy Osiyo jahondagi suv tanqisligi muammolariga duch kelgan va ekologiyasi zaiflashgan mintaqalardan biri sanaladi. Orol fojiasi, qurg‘oqchilik, havo ifloslanishi, cho‘llanish bular ko‘z o‘ngimizda sodir bo‘layotgan voqeliklardir. Forum orqali bu muammolar haqida faqat gapiribgina qolmasdan, ularga jahon jamoatchiligining e’tiborini qaratish va amaliy moliyaviy va texnologik yordam jalb qilish mumkin bo‘ladi.

Boisi, forumda dunyo miqyosidagi ekologlar, siyosatchilar, xalqaro tashkilotlar vakillari, olimlar, OAV va faollar ishtirok etadi. Forum doirasida yuqorida ta’kidlanganidek, mintaqada iqlim o‘zgarishining ta’sirlari, suv resurslari va Orol dengizi muammosi, “yashil energetika” va uglerod neytralligi, qishloq xo‘jaligida moslashuv strategiyalari hamda transport va shaharsozlikda ekologik yondashuvlar kabi masalalar muhokama qilinishi kutilmoqda.

Shu bois, forumning O‘zbekistondagi ekologik muammolarni hal qilishdagi o‘rni yuqori. Chunki, forum doirasidagi muloqotlar yakunida sohada qabul qilinayotgan davlat strategiyalari uchun xalqaro grantlar olish imkoniyati kengayadi. Sababi, forumda ishtirok etayotgan xalqaro tashkilotlar jumladan, BMT, Yevropa Ittifoqi, BRIKS, Jahon banki, GCF (Green Climate Fund) kabilar ekologik loyihalarni moliyalashtiruvchi asosiy manbalar hisoblanadi.

Qolaversa, forum akademik doiralar, talabalar va yosh tadqiqotchilar uchun ham yangi imkoniyatlar eshigi ochilishiga xizmat qiladi. Xususan, Erasmus+, Horizon Europe kabi dasturlar orqali talabalar va olimlar uchun qo‘shimcha imkoniyatlar yaratiladi. Bu esa, iqlim fanini rivojlantirish, innovatsiya va startaplar uchun katta imkoniyat demakdir.

Xulosa qilib aytganda, Samarqand iqlim forumi bu nafaqat ekologiya masalalarini muhokama qilish maydoni, balki O‘zbekistonning xalqaro siyosatdagi ekosiyosiy pozitsiyasini ko‘rsatuvchi muhim qadamdir. Ushbu tadbir orqali mamlakatimiz global iqlim siyosatining faol ishtirokchisiga aylanishi hamda yangi loyihalar, mablag‘lar va sheriklarga ega bo‘ladi.

Mavluda ADHAMJONOVA,

Oliy Majlis Qonunchilik palatasining Ekologiya va atrof-muhitni muhofaza qilish masalalari qo‘mitasi a’zosi.