Chirchiq oliy tank qo‘mondonlik-muhandislik bilim yurti 99 yoshga to‘ldi

Chirchiq oliy tank qo‘mondonlik-muhandislik bilim yurti nafaqat oliy harbiy ta’lim muassasalari, balki yurtimizdagi o‘quv dargohlari orasida boy tarixi, shonli an’analari bilan o‘ziga xos obro‘ga ega ta’lim muassasasi hisoblanadi.

Mazkur bilim yurtida Havo-desant qo‘shinlari taktik qo‘mondonligi, Zenit raketa qo‘shinlari taktik qo‘mondonligi, Maxsus operatsiya kuchlari, terrorizmga qarshi kurashish bo‘linmalari taktik qo‘mondonligi hamda Zirxli tank qurollari va texnikasi taktik muhandisligi yo‘nalishlari bo‘yicha yuqori malakali ofitserlar tayyorlanmoqda.

Shuningdek, bilim yurtida nazariy bilimlar amaliy mashg‘ulotlar bilan uyg‘unlikda olib borilmoqda. Buning uchun oliy harbiy ta’lim muassasasi hududida alohida amaliy mashg‘ulotlar o‘tkazish majmualari, zamonaviy o‘quv trenajorlar tashkil etilgan. Bu esa o‘z o‘rnida sarhadlarimizni himoya qiluvchi harbiylar uchun malakasini oshirish va o‘z ustida ishlashi uchun qulay shart-sharoit demakdir.

Mazkur harbiy ta’lim muassasasi tantanavor ravishda o‘zining bir kam 100 yilligini nishonladi. Tadbirda so‘zga chiqqanlar mamlakatimiz sarhadlari daxlsizligi va tinchligini ta’minlashga qodir malakali harbiy kadrlar tayyorlashda mazkur bilim yurti o‘ziga xos nufuzga va o‘ringa egalini ta’kidlashdi.

Tadbirda bilim yurti tashkil topgan kun munosabati bilan ta’lim yo‘nalishida muvaffaqiyatlarga erishgan, o‘z xizmat vazifalariga sidqidildan yondashib o‘quv-tarbiya jarayonlarini takomillashtirishda faol ishtirok etayotgan bir guruh harbiy xizmatchilar hamda Qurolli Kuchlar xizmatchilariga esdalik sovg‘alari topshirildi.

Qurolli Kuchlar Markaziy ashula va raqs ansambli hamda xushovoz xonandalar tomonidan konsert dasturi bayramga yanada tantanavor ruh bag‘ishladi.