O'zbekistondagi masjidlardagi issiq suv va isitish tizimlari nazoratdan o'tkazilmoqda
Mo‘min-musulmonlar emin-erkin ibodat qilishi uchun qulay va xavfsiz sharoitlar yaratish uchun rejali ishlar doimiy amalga oshirib kelinadi. Ayniqsa, bayram kunlari, katta jamoat yig‘iladigan vaqtlarda masjid xonaqohlari, qo‘shimcha binolari, tahoratxonalari va tutash bo‘lgan inshootlarda har jihatdan osoyishtalikni taʼminlashga katta urg‘u qaratiladi. Masalan, o‘tgan Ramazon oyi va hayit kuni Diniy idorada shtab tuzilib, masjidlarda tunu kun navbatchiliklar tashkil etildi. Natijada, ulug‘ ayyom kunlarini tinch-osuda o‘tishiga erishildi.
Shuni maʼlum qilamizki, ayni kunlarda ham masjidlarning texnik va yong‘in xavfsizligi talablariga muvofiqligi, issiq suv hamda issiqlik energiyasi bilan taʼminlash tizimlarini navbatdagi nazoratdan o‘tkazish ishlari olib borilmoqda. Ushbu tadbirlarga mahalliy hokimliklar vakillari, Favqylodda vaziyatlar vazirligi, Qurilish va uy-joy kommunal xo‘jaligi vazirligining hududiy boshqarmalari kabi tashkilotlar mutaxassislaridan iborat hududiy Ishchi guruhlari jalb etilgan.
O‘rganishlar davomida belgilangan talablarga javob bermaydigan ayrim masjidlardagi issiq suv hamda issiqlik energiyasi bilan taʼminlashdagi kamchiliklar qisqa muddatlarda bartaraf etilib, issiqlik va tabiiy gaz taʼminoti qayta tiklanmoqda.
O‘z navbatida mo‘min-musulmonlar ham mana shunday profilaktik tadbirlarni to‘g‘ri tushunib, olib borilayotgan ishlarda hamjihat bo‘lishlarini so‘raymiz. Zero, mana shunday chora-tadbirlardan maqsad fuqarolarimiz ibodat qilishi uchun qulay va xavfsiz sharoitlar yaratishdir.
.png "YouTube UZREPORT TV")
