Asad oilasining boyligi 12 mlrd dollarga teng bo‘lishi mumkin - WSJ

2021 yilda butun Suriyaning yalpi ichki mahsuloti (YaIM) atigi 8,98 milliard dollarni (8,54 milliard yevro) tashkil etganiga qaramay, Bashar Asad oilasining aktivlari qiymati 12 milliard dollarga (11,4 milliard yevro) yetishi mumkin. Bu haqda Amerikaning The Wall Street Journal gazetasi 15 dekabr, yakshanba kuni xabar berdi.

Asad rejimining qulashi bilan Suriyada 50 yildan ortiq vaqt davomida hokimiyat tepasida turgan uning oilasining ko‘p milliard dollarlik boyligi uchun global ov boshlandi, deb yozadi nashr.

«Inqilobdan oldin ularning pullarni yuvish uchun ko‘p vaqtlari bor edi, ularda har doim »B« rejasi bo‘lgan va ular haydalishga yaxshi tayyorgarlik ko‘rishgan», dedi Oq uy Xavfsizlik kengashi huzuridagi tuzilmalardan birida Suriya siyosati uchun mas’ul bo‘lgan Endryu Tabler.

Tabler - Vashington Yaqin Sharq siyosati instituti xodimi. Ilgari u Asad oilasi a’zolariga nisbatan sanksiyalar qo‘llash uchun ularning mol-mulkini aniqlash ustida ishlagan.

Bashar Asad va uning otasi Hofiz qarindoshlari yordamida boyliklarini xorijda yashirgan, deya ta’kidladi WSJ.

RFda ko‘chmas mulk, Venadagi mehmonxonalar va Dubaydagi samolyot

Asad klanining boyligi aniq hajmi va qaysi oila a’zolari qaysi aktivlarni nazorat qilishi noma’lum. Bashar Asadning qarindoshlari tomonidan yillar davomida amalga oshirilgan xalqaro xaridlar orasida: Rossiya Federatsiyasidagi hashamatli ko‘chmas mulk, Venadagi butik mehmonxonalar va Dubaydagi shaxsiy samolyot bor.

2013 yildan 2019 yilgacha sobiq prezidentning qarindoshlari Moskva shahridan qiymati 40 million dollar (38 million yevro) bo‘lgan kamida 20 ta hashamatli kvartira sotib olishgan, deb yozadi Financial Times.

AQSh Davlat departamentining 2022 yildagi hisob-kitoblariga ko‘ra, Asadlar bilan bog‘liq korxonalar va aktivlarning qiymati 1 milliarddan 12 milliard dollargacha (950 ming yevrodan 11,4 milliard yevrogacha) bo‘lishi mumkin.

Ushbu mablag‘lar ko‘pincha davlat monopoliyalari va giyohvand moddalar savdosi, xususan, Captagon savdo belgisi ostida amfetamin birikmasi orqali olingan va keyinchalik qisman xalqaro huquqqa ega bo‘lmagan yurisdiksiyalarga qayta investitsiya qilingan, deya ta’kidlaydi WSJ.