Buyuk Britaniya Ukrainaga yashirincha uzoqqa uchadigan raketalar yetkazib berdi

Buyuk Britaniya yaqinda Ukrainaga Storm Shadow uzoq masofaga uchuvchi qanotli raketalarning yangi partiyasini yubordi. Bu haqda Bloomberg xabar berdi.

Yetkazib berish Britaniya va AQSH o‘zining uzoq masofali raketalarini Rossiya hududiga uchirishga ruxsat berishi to‘g‘risidagi qaroridan oldin amalga oshirilgan. Gap o‘nlab Storm Shadow qanotli raketalari haqida bormoqda. 

Londondan va Vashingtonning qarorlariga Rossiya urushda shimoliy koreyalik harbiylardan foydalanayotgani turtki bo‘ldi. Ukraina prezidenti Vladimir Zelenskiy bungacha bir necha bor G‘arb qurollari bilan Rossiyaga hujum qilish uchun ruxsat ololmagandi.

Biroq ruxsat berish qarori prezident Jo Bayden va uning ittifoqchilari tomonidan Ukrainani muzokaralarda kuchaytirish uchun qabul qilingan bo‘lishi mumkin. Chunki yangi saylangan prezident Donald Tramp urushni tezda tugatishga va’da bergan, u Ukrainaga harbiy yordamni qisqartirmoqchi.

Manbalar raketalar qachon yetkazib berilgani va ularning sonini xavfsizlik yuzasidan oshkor etmagan. Storm Shadow raketalarining yangi partiyasini Ukrainaga topshirish birinchi marta Britaniya bosh vaziri Kir Starmer davrida bo‘lib o‘tdi. Siyosatchi Ukrainani Rossiyaning harbiy tajovuziga qarshi o‘z-o‘zini himoya qilishda qo‘llab-quvvatlashni davom ettirishga va’da bergan.

Ommaviy e’lon qilinmagan yetkazib berishlar bir necha hafta oldin bo‘lib o‘tgan va Kiyevda uzoq masofali raketalar tugagandan keyin buyurtma qilingan, deydi manbalar.

Storm Shadow — uzoq masofaga uchuvchi va yuqori aniqlikka ega bo‘lgan havo-yer sinfidagi qanotli raketa. Dastlab Buyuk Britaniya va Fransiya hamkorligida ishlab chiqilgan. Uning uchish masofasi 560 kilometrdan oshadi. Bu raketa odatda strategik va yuqori darajada muhofazalangan nishonlarni yo‘q qilishga mo‘ljallangan.