Moskva milliarderlar soni bo‘yicha dunyoning ikkinchi shahriga aylandi

Bir yil ichida Moskvada boylar soni 16 nafarga ko‘paydi, shundan 11 nafari reytingda ilk bor qayd etilgan. 2025 yil 7 mart holatiga ko‘ra, shaharda jami 90 nafar milliarder bor. Ular umumiy hisobda 409 mlrd dollar kapitalga ega — bu o‘tgan yilgi natijadan 31 mlrd dollarga ko‘proq.

Forbes ma’lumotiga ko‘ra, dunyo bo‘ylab barcha milliarderlarning umumiy boyligi 3,3 trln dollarni tashkil etadi. Eng boy moskvalik — neft magnati Vagit Alekperov (boyligi 28,7 mlrd dollar). Bu mablag‘ning yarmidan ko‘pi unga «Lukoyl» kompaniyasidagi ulushi hisobiga to‘g‘ri keladi. U 2024 yilda faqat dividend sifatida 2 mlrd dollardan ziyod daromad olgan. Oligarxning boyligi, Buyuk Britaniya va Avstraliya sanksiyalaridan so‘ng 2022 yil aprelida «Lukoyl» prezidenti lavozimini tark etganiga qaramay, 100 million dollarga oshgan.

Milliarderlar soni keskin o‘sgani sabab Moskva o‘tgan yili u bilan ikkinchi o‘rinni bo‘lishgan Hongkongni ortda qoldirdi. Bu gal Hongkong — Forbes reytingidagi birinchi o‘nlikka kirgan Xitoyning uchta shahridan biri — 72 nafar milliarder bilan uchinchi o‘ringa tushdi. Reytingning doimiy yetakchisi — Nyu York — o‘tgan yil ichida yana 13 nafar milliarderni qo‘shib oldi. Endi shaharda 123 nafar dollar milliarderi bor. Ularning umumiy boyligi 759 mlrd dollarni tashkil etadi. Ular orasida eng boyi — Maykl Blumberg (boyligi 105 mlrd dollar).

2024 yilda butun Rossiya bo‘ylab dollar milliarderlar soni g‘arb sanksiyalariga qaramay 125 nafardan 146 nafargacha ko‘paydi, deb xabar bergan edi Forbes. Bu raqam dunyodagi eng boy biznesmenlar reytingi tarixi uchun rekord ko‘rsatkichdir. 15 nafar rossiyalik ilk bor ro‘yxatga kirdi, yana 10 nafari unga qaytdi. Faqatgina to‘rt nafar kishi ro‘yxatdan chiqarilgan.

Reytingda qayd etilgan rossiyaliklar umumiy boyligi ham rekord darajaga yetdi — ular birgalikda 625,5 mlrd dollar ishlab topgan. 2023 yilda bu ko‘rsatkich 576,8 mlrd dollarni tashkil etgan edi. Ilgarigi rekord — 606,2 mlrd dollar — 2021 yilda, Rossiya Ukrainaga bostirib kirishdan avval qayd etilgan.

Shu bilan birga, Rossiyadagi eng boy oligarxlarning umumiy boyligi mamlakat aholisining bank tizimidagi barcha jamg‘armalaridan oshib ketdi — 63,3 trln rubl. Rossiyaliklar banklarda bor-yo‘g‘i 57,5 trln rubl saqlamoqda (2025 yil 1 yanvar holatiga).