Shimoliy Makedoniyadagi prezidentlik saylovlarining ikkinchi bosqichida muxolifat nomzodi Gordana Silyanovska-Davkova 65 foizga yaqin ovoz bilan g‘alaba qozondi. Amaldagi prezident Stevo Pendarovski mag'lubiyatini tan oldi
Shimoliy Makedoniyaning yangi prezidenti va bu lavozimni egallagan birinchi ayol 70 yoshli huquq professori Gordana Silyanovska-Davkova, eng yirik muxolifatdagi milliy konservativ partiya, Ichki Makedoniya inqilobiy tashkiloti – Makedoniya milliy birligi demokratik partiyasi vakili.
Saylov komissiyasi ma'lumotlariga ko'ra, u 65 foizga yaqin ovoz to'plamoqda. Amaldagi prezident, sotsial-demokrat Stevo Pendarovski 29 foizdan sal ko‘proq ovoz oldi va mag‘lubiyatini tan oldi.
“Natijalar aniq, lekin mening vijdonim toza, natijalardan kelib chiqib, g‘oliblarni tabriklayman va kelgusi besh yilda muvaffaqiyatli ishlashlarini tilayman”, dedi u.
Qayd etilishicha, iqtisoddagi muammolardan norozilik to‘lqini va mamlakatning YeIga a’zo bo‘lishini uzoq kutish tufayli muxolifatning reytingi sezilarli darajada oshgan. Shimoliy Makedoniya 2005-yildan beri Yevropa Ittifoqiga a’zo bo‘lishga nomzod, biroq qo‘shnilari Bolgariya va Gretsiya bilan kelishmovchiliklar va a’zolik uchun zarur bo‘lgan islohotlar bo‘yicha sekin taraqqiyot tufayli uning arizasi hali ma’qullanmadi.