Shvetsiya yadroviy urushga tayyorlanmoqda: mamlakatda 64 mingta bunker modernizatsiya qilinadi

Shvetsiya Yevropada urush xavfi sababli fuqarolik mudofaa bombapanagohlarini qayta tiklashga 100 million krona (9,2 million yevro) yo‘naltiradi. Hukumatning rejasiga muvofiq, jami 64 mingta bunker fuqarolarni yadroviy zarba, kimyoviy va biologik qurollardan himoyalaydigan tarzda modernizatsiya qilishi kerak. Prognozlarga ko‘ra, bunga ikki-uch yil vaqt sarflanadi.

Shvetsiya dunyodagi eng yirik bombapanagohlar tarmog‘iga ega davlatlardan hisoblanadi. Mamlakatdagi shu kabi bunkerlarga 7 millionga yaqin odam — aholining uchdan ikki qismi sig‘adi. Ayni vaqtda bir necha ming kishiga mo‘ljallangan 25 ta katta hajmli bunkerlarni rekonstruksiya qilish boshlangan. Mart oxirlarida Shvetsiya bosh vaziri Ulf Kristersson mudofaa xarajatlarini sovuq urush davridan beri rekord darajaga yetkazmoqchi ekanini ma’lum qilgandi. Yangi strategiya doirasida u 2030 yilga borib YaIMning 3,5 foiziga yetkaziladi. Bosh vazirning so‘zlariga ko‘ra, armiyaning modernizatsiyasi g‘aznaga 300 milliard kronaga (qariyb 28 milliard yevro) tushadi.

Shvetsiya Qurolli kuchlarini yangilash va fuqarolik mudofaasini mustahkamlashni Rossiya Ukrainaga hujum qilganidan keyin faollashtirdi. Urush boshlangach, mamlakat NATO a’zoligiga ariza berdi, bunga qadar 200 yildan ortiq vaqt davomida neytralitetni saqlab kelayotgandi. O‘z navbatida hukumat va qirollik armiyasi qo‘mondoni fuqarolarni ehtimoliy urushga tayyor turishga chaqirdi. Qrim anneksiyasidan keyin Shvetsiya harbiy majburiyatni qayta tikladi va Boltiq dengizidagi Gotland orolini qayta harbiylashtirdi. Endi esa u o‘zining mudofaa xarajatlarini bosqichma-bosqich oshirib bormoqda. 2025 yilda harbiy xarajatlar hajmi 138 milliard kronani (YaIMning 2,4 foizi) tashkil etishi kutilyapti.