Zelenskiy: Kiyev 2025 yilda urushni tugatish uchun hamma narsani qiladi

Ukraina prezidenti Vladimir Zelenskiy Kiyev urushni 2025 yilda tugatish uchun hamma narsani qilishini aytdi. Ukraina rahbarining 1 yanvar, chorshanbaga o‘tar kechasi yangi yil murojaati davlat rahbarining internetdagi rasmiy vakolatxonasi tomonidan tarqatildi.

«2025 yil bizning yilimiz, Ukraina yili bo‘lsin, biz bilamizki, bizga tinchlik berilmaydi, lekin biz Rossiyani to‘xtatish va urushni tugatish uchun hamma narsani qilamiz», — dedi Zelenskiy.

Kiyev «Yevropa Ukrainasi» tomon harakatlanishda davom etadi

Ukraina rahbari Kiyevning «Yevropa Ukrainasi» sari intilishda davom etishiga umid bildirdi. U 2024 yil iyun oyida Ukrainaning Yevropa Ittifoqiga qo‘shilishi bo‘yicha muzokaralar boshlanganini eslatdi.

«Ukraina Yevropa Ittifoqida bo‘ladi va bir kun kelib Ukraina NATOda bo‘ladi va ittifoqni mustahkamlaydi», dedi u.

«Men, barchamiz yetarlicha kuchli bo‘lgan Ukraina uchun kurashishimiz kerak, chunki urush maydonida ham, muzokaralar stolida ham shunday Ukraina hurmat qilinadi va eshitiladi», dedi Zelenskiy.

Siyosatchi va uning rafiqasi Yelena Zelenskaya Telegramʼda ham ukrainaliklarni 2025 yil bilan tabrikladi. Ular 2024 yil Ukraina g‘alabasi sari yana bir qadam bo‘lganiga umid bildirdilar.

Bloomberg: UQK 2025 yilda Kursk oblastini tark etishi mumkin

Ukraina bir necha oy ichida Rossiya Federatsiyasining Kursk oblastida qo‘lga kiritgan hududlarini yo‘qotishi mumkin, deb xabar berdi Bloomberg 27 dekabr kuni ismini oshkor qilishni istamagan bir necha AQSh rasmiylariga tayanib. Nashrning eslatishicha, Ukraina Qurolli kuchlari shu yilning yozida bosib olgan hududning yarmi ustidan nazoratni allaqachon yo‘qotgan. Uning suhbatdoshlari bu Kiyevning Rossiya bilan o‘t ochishni to‘xtatish bo‘yicha ehtimoliy muzokaralardagi pozitsiyasini zaiflashtirishi mumkinligidan xavotirda.

Bloomberg manbalariga ko‘ra, bunga Ukraina Qurolli kuchlari saflarida askarlarning yetishmasligi hamda AQSh va boshqa ittifoqchilardan kelajakda qurol-yarog‘ yetkazib berilishi borasidagi noaniqlik sabab bo‘lgan. Shuning uchun ukrainalik harbiylar Kursk oblastidagi hududni bahorgacha ushlab turishi mumkin, keyin esa chekinishga majbur bo‘ladi yoki qurshab olinish xavfi tug‘iladi. Ikki suhbatdosh Ukraina prezidenti Vladimir Zelenskiy og‘ir yo‘qotishlarga yo‘l qo‘ymaslik uchun mintaqadan o‘z vaqtida chekinishga buyruq berishiga umid bildirdi.