O'zbekiston viloyatlari va Xitoyning Guansi-Chjuan avtonom rayoni o'rtasida hududlararo aloqalar yo'lga qo'yiladi

O'zbekistonning Guanchjou shahridagi Bosh konsulxonasi diplomatlari hududlararo hamkorlikni kengaytirish va mamlakatimiz investitsiya, eksport va turizm salohiyatini keng targ'ib qilish maqsadida amaliy safar Xitoyning Guansi-Chjuan avtonom rayonida bo'ldilar. 

Tashrif davomida "Bir makon va bir yo'l" tashabbusi mamlakatlari o'rtasidagi iqtisodiy va savdo hamkorligi" mavzusidagi forumda Guansi kompaniyalari uchun O'zbekistonning investitsion va turizm salohiyatiga bag'ishlangan taqdimot o'tkazildi.

Guansi Tashqi savdoga ko'maklashish qo'mitasi, ushbu hududning tuman va yirik shaharlari va kompaniyalari rahbarlari bilan suhbatda Xorazm viloyati bilan hududlararo hamkorlikning amaliy natijalarga yo'naltirilgan kelishuvlarni amalga oshirishni jadallashtirish masalalari muhokama qilindi. 

Shu bilan birga eksport hajmini oshirish maqsadida tovuq panjalarini yetkazib berish bo'yicha xitoylik importyor va savdo majmualari bilan kelishuvlarga erishildi.

O'zbekiston diplomatlari tashrif davomi Guylin shahri tashqi ishlar boshqarmasi boshlig'i Ven Pu bilan alohida uchrashuv o'tkazdilar.

Xitoy tomoniga mamlakatimizda amalga oshirilgan islohotlar, hududlarimizning investitsion salohiyati hamda shu yil 27-oktabr kuniga belgilangan parlament saylovlari haqida so'zlab berildi.

Bugungi kunda Guylin 10 ta mamlakatning 12 ta shahri bilan birodarlik aloqalarini o'rnatgani inobatga olinib, mamlakatimiz shaharlari bilan ham yaqin do'stlik rishtalarini o'rnatishdan manfaatdorlik bildirildi.

Xitoyning Nannin va Guylin shaharlarida o'tkazilgan uchrashuvlardan yakunida tomonlar hududlararo hamkorlikni kengaytirishga qaratilgan qo'shma tadbirlar, ko'rgazma va biznes missiyalarni tashkil etishga kelishib oldilar.