Aholining mol-mulk va yer soliqlaridan qarzdorliklari bo‘yicha 500 milliard so‘m penya kechib yuboriladi — Shavkat Mirziyoyev

Tadbirkorlar va ishbilarmonlar harakati – O‘zbekiston Liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyevning qoraqalpog‘istonlik saylovchilar bilan uchrashdi.

Tadbirda nomzod saylovchilarni o‘zining saylovoldi dasturi bilan tanishtirdi.

"Yoshlar uchun maxsus uy-joylar quriladi va kelgusi yetti yilda har yili 1 mingta yosh oilaga imtiyozli ipoteka kreditlari beriladi. Buning uchun, mazkur loyihaga Xo‘jayli tumanidan birinchi bosqichda 100 gektar yer ajratiladi hamda 100 million dollar mablag‘ yo‘naltiriladi", – Shavkat Mirziyoyev.

Shuningdek, Xo‘jayli tumanida tashkil qilinadigan “Yoshlar ijtimoiy-iqtisodiy markazi”ga erkin iqtisodiy zona maqomi beriladi va ishsiz yoshlar bandligini ta’minlash sharti bilan tadbirkorlarga soliq va bojxona imtiyozlari taqdim etiladi. Ushbu Markazda nafaqat ishlab chiqarish ob’yektlari, balki kasbga o‘qitish markazlari, IT park filiali, loyiha ofislari joylashtiriladi.

Ellikqal’a, Qo‘ng‘irot va Mo‘ynoq tumanlari turizmga ixtisoslashtiriladi. To‘rtko‘l, Beruniy, Amudaryo, Xo‘jayli, Qonliko‘l, Qo‘ng‘irotda yo‘l-savdo infratuzilmasi kengaytiriladi.

"Shuningdek, Toshkentdan Nukusga tezyurar poyezd qatnovi yo‘lga qo‘yilib, yo‘lovchilarning manzilga yetib borish vaqti 16 soatdan 7 soatgacha qisqaradi.  Buning uchun, uzunligi 465 kilometr bo‘lgan “Buxoro-Urganch-Xiva” va uzunligi 196 kilometr bo‘lgan “Miskin-Nukus” temir yo‘l liniyalari elektrlashtiriladi. Bu loyihaga 460 million dollar yo‘naltiramiz. Ushbu liniya ishga tushirilgach, “Toshkent – Samarqand – Buxoro – Xiva” an’anaviy turistik zanjiriga Qoraqalpog‘iston ham qo‘shiladi.

Natijada, xorijiy va mahalliy sayyohlarning yurtimizda 4-5 kungacha bo‘lishini ta’minlash, turistik xizmatlar eksportini 100 million dollarga yetkazish imkoniyati yaratiladi (2023 yilda 25 million dollar)”, – dedi Mirziyoyev.

Shu bilan birga, nomzod aholining mol-mulk va yer soliqlaridan qarzdorliklari bo‘yicha 500 milliard so‘m penya kechib yuborilishini ma'lum qildi.

“Mahallaning moliyaviy mustaqilligini oshirish bo‘yicha ham qator yangiliklar qilinadi. Bu borada, aholidan yig‘iladigan mol-mulk va yer soliqlari yagona mulk solig‘i bo‘lib birlashadi va aholidan undiriladigan qismi mahalla byudjetiga to‘liq o‘tkaziladi. Bu – Qoraqalpog‘istondagi mahallalar ixtiyorida har yili 230 milliard so‘mdan qo‘shimcha mablag‘ qoladi, degani.

Shuningdek, mamlakat bo‘yicha aholining mol-mulk va yer soliqlaridan qarzdorliklari bo‘yicha 500 milliard so‘m penya kechib yuboriladi. (Qoraqalpog‘istonda 20 milliard so‘m).

Shu bilan birga, mahallalar uchun “Ochiq budjet” imkoniyatlarini yanada kengaytiramiz va unga ajratiladigan mablag‘larni 3 karra oshiramiz. Endi, “Ochiq byudjet” loyihalari g‘olib bo‘lishi uchun 1,5 ming ovoz yetarli bo‘ladi va ushbu maqsadlar uchun yil yakuniga qadar yana 1,2 trillion so‘m ajratamiz”, – dedi nomzod qoraqalpog‘istonlik saylovchilar bilan uchrashuv chog‘ida.