"Men o‘zbekistonlikman – qonimda g‘alaba" — Ўзбекистон олимпия терма жамоаси мадҳияси тақдим этилди

Тарихий натижа қайд этиб, Олимпиада йўлланмасини қўлга киритган Футбол бўйича Ўзбекистон олимпия терма жамоасини қўллаб-қувватлаш мақсадида “Uzbekistan’s Club” ташаббуси билан Ўзбекистон креатив саноати етакчилари иштирокида “Men o‘zbekistonlikman – qonimda g‘alaba” шиори остида жамоа мадҳияси учун видео суратга олинди.

Ўзбекистонликларни бир мақсад йўлида бирлаштириш, олимпия жамоамизни бўлажак йирик мусобақада қўллаб-қувватлашга қаратилган лойиҳа учун Констанинг “O‘zbekistonlik” треки мадҳия сифатида танлаб олинди. Суратга олиш ишларида бош мураббий Темур Кападзе ва жамоа юлдузлари иштирок этишди.

Жаҳон даражасидаги ушбу видеони суратга олишда нафақат энг яхши маҳаллий мутахассислар, балки германиялик кинооператор Макс Цуи жалб қилинди. Унда терма жамоамизнинг барча футболчилари, юлдузларимиз Аббос Файзуллаев, Элдор Шомуродовлар ҳамда мураббий Тимур Кападзе, шунингдек, санъат ва медиа соҳасининг ёрқин намояндалари суратга тушди.

Видео Ўзбекистоннинг барча телеканаллари, жамоат жойларидаги экранлар ҳамда интернет кенгликларида намойиш этилмоқда.

Лойиҳа санъаткорлар, журналист ва блогерлар, инфлюенсер ва фикр етакчилари бўлмиш Ўзбекистон креатив саноати намояндаларини ягона ғоя остида жамлади. Тасвирга олиш ишларида Venkon PR, United Soft, Dilshoh Media Art Сraft, LegalMax, Ahad Mix каби компаниялардан иборат махсус ижодий гуруҳ шакллантирилди, Германиядан таниқли кинооператор Макс Цуи таклиф этилди.

Мазкур видеоконтент билан биргаликда кенг миқёсдаги #qonimdagalaba халқаро челленжига старт берилди. Челленжда исталган одам иштирок этиши мумкин. Иштирок этиш учун хоҳловчилар 17 июлга қадар «Ўзбекистонлик» трекидан фойдаланиб, футбол мавзусида суратга олинган 1 дақиқали креатив видеони Инстаграм’га #qonimdagalaba ҳештеги билан жойлаши талаб қилинади. 10 та энг яхши видеонинг ҳар бири учун 50 миллион сўм пул мукофоти берилади. Уларни машҳур спортчилар ва медиа вакилларидан иборат ҳайъат аъзолари саралаб олади.

Лойиҳа ташаббускорлари: Ўзбекистон Республикаси Вазирлар Маҳкамаси, Ўзбекистон футбол ассоциацияси, Миллий Олимпия қўмитаси, Ўзбекистон маҳаллалари уюшмаси, Ёшлар ишлари агентлиги, Ташқи ишлар вазирлиги, Инвестиция, саноат ва савдо вазирлиги, «Ватандошлар» жамоат фонди ва Маънавият ва маърифат маркази.

Спортчиларимизга мухлислик қилиш орқали ўзбекистонликларни бирлаштириш ғоясини, шунингдек, Uzbekistan Airways, Ucell, Chevrolet Uzbekistan, Kapitalbank ва Ёшлар ташаббуслари маркази, Gross Insurance, МТРК, МY5, FTV, ZO‘R TV, Uzreport TV, Renessans TV, Kun.uz, Daryo.uz, Repost.uz, Tribuna.uz сайтлари қўллаб-қувватлади.