Metan quyish shoxobchalari 6 soat davomida odatdagi rejimda ishlaydi

Energetika vazirligi xabarida qayd etilishicha, 22 dekabr kuni soat 10:00–16:00 oralig‘ida O‘zbekiston bo‘yicha barcha “metan zapravka”lar shtat rejimida ishlaydi. 

Vazirlik mazkur vaqt oralig‘ida haydovchilarga metan quyish xizmati odatdagi tartibda ko‘rsatilishini bildirgan.

So‘nggi haftalarda ayrim hududlarda metan quyish kompressor shoxobchalari faoliyati vaqtinchalik grafik asosida tashkil etilayotgani haqida xabarlar berilgan. 

Xususan, avvalroq Kun.uz xabarida “Hududgazta’minot” filiallari ma’lumotlariga tayanilgan holda hududlar kesimida ish vaqtlari turlicha belgilangani va cheklovlar hokimliklar bilan kelishilgan qaror asosida kiritilgani keltirilgan. 

Bunday choralar sovuq kunlarda aholi va ijtimoiy infratuzilmani gaz bilan uzluksiz ta’minlash maqsadida vaqtincha joriy etilgan. Shuningdek, 11 dekabr kuni Energetika vazirligi shoxobchalar ish faoliyati cheklanishi haqida ma’lum qilib, bu qaror qo‘shni davlat gaz tizimidagi nosozliklar ortidan import hajmi qisqargani bilan izohlangani aytilgan. 

“Hududgazta’minot” gaz quvurlarida bosimni me’yorga keltirish bo‘yicha ishlar olib borayotgani, cheklovlar vaqtincha ekani bildirilgan.

Izohlar: 0
Siz identifikatsiyadan o'tmadingiz
Ro'yxatda bo'lmay turib izoh qo'shish

Tepaga

Alpha version: 0.9.1.19 build 122211 | Инструменты