O'zbekistonlik o'quvchilar IV "Lomonosov kunlari – Berlin 2024" xalqaro olimpiadasida sovrinli o'rinlarni qo'lga kiritdi

Joriy yilning 16-23-noyabr kunlari Berlindagi Lomonosov nomidagi xalqaro maktabda IV "Lomonosov kunlari – Berlin 2024" xalqaro olimpiadasi bo'lib o'tdi. 

Xalqaro bilimlar bellashuvida Germaniya, Armaniston, Mo'g'uliston, Latviya, Gruziya va Qirg'iziston qatori O'zbekiston vakillari ham faol ishtirok etdi. Unda jami 80 nafardan ortiq o'quvchi o'z bilimi va qobiliyatini sinovdan o'tkazdi.

Mazkur bilimlar bellashuvida O'zbekiston nomidan Toshkent shahridagi "Sehriyo" va Namangan shahridagi "Istiqbol zamon bolalari" nodavlat ta'lim muassasalari o'quvchilari qatnashdi.

Olimpiada sinovlari uch yo'nalishda, ya'ni tabiiy fanlar bo'yicha jamoaviy bellashuv, fanlar va loyihalar bo'yicha bellashuv tarzida olib borildi. Umumjamoa bellashuvlarida o'quvchilar 7-9-sinflarga oid tarix, geografiya va tabiiy fanlardan o'z bilimlarini sinovdan o'tkazdilar. Alohida fanlar olimpiadasi matematika, rus, ingliz va nemis tillari bo'yicha bo'lib o'tdi. Loyihalar taqdimoti bellashuvida o'quvchilar o'zlari tayyorlab kelgan dolzarb mavzular bo'yicha taqdimotni taqdim etdilar.

O'zbekiston jamoalari umumiy hisobda to'rtta sovrinli o'ringa sazovor bo'ldi. Xususan, "Sehriyo" maktabi o'quvchilari rus tili yo'nalishida 1-o'rinni, ingliz tili yo'nalishida 2-o'rinni, "Istiqbol zamon bolalari" maktabi o'quvchilari esa ilmiy izlanishga asoslangan dolzarb mavzu loyihasi bo'yicha jamoaviy musobaqada ikkinchi o'rinni qo'lga kiritdi. Shuningdek, poytaxtimizdagi "Sehriyo" maktabi tarix, geografiya va tabiiy fanlar bo'yicha umumjamoa bellashuvida faxrli uchinchi o'rinni qo'lga kiritdi.

"Ushbu nufuzli olimpiadada o'zbekistonlik o'quvchilar faxrli o'rinlarni egallashdi va barcha loyihalarda faol ishtirok etishdi. O'zimni va ta'lim muassasamiz jamoasi nomidan birinchi ushbu yoshlarning sifatli ta'lim olishi uchun imkoniyat yaratib berayotgan O'zbekiston hukumatiga va ustozlariga tashakkur bildiraman", – dedi Lomonosov nomli xalqaro maktab direktori Marianna Burd.

Olimpiyada doirasida O'zbekiston o'quvchilari uchun Berlin, Leypsig, Potsdam shaharlariga ekskursiyalar tashkil qilindi.