Poytaxtda qurilgan yangi ko'p qavatli uyda 5 yildan beri gaz yo'qligi haqida xabarlar tarqaldi

Ijtimoiy tarmoqlarda "Sergelida 5 yildan beri gazsiz yashayotgan novostroykadagilar", - deya odamlarning eʼtirozlari aks etgan video yuzasidan xabarlar tarqaldi. 

Toshkent shahar Qurilish va uy-joy kommunal xo‘jaligi sohasida hududiy nazorat qilish inspeksiyasi mazkur holat bo‘yicha quyidagilarni maʼlum qildi. 

Qayd etilishicha, Yangihayot tumani Yo‘ldosh-6 mavzesidagi ushbu turar joy "ERAM QURILISH" MCHJga tegishli bo‘lib, obyektda qurilish-montaj ishlari Hukumatning tegishli qarori asosida inspeksiyani xabardor etmagan holda o‘zboshimchalik bilan boshlab yuborilgan.

Ushbu holat yuzasidan "ERAM QURILISH" MCHJga nisbatan 2021 yil 7 iyul kuni yozma ko‘rsatma berilgan. Biroq belgilangan kamchiliklar o‘z vaqtida bartaraf etilmagach, O‘zbekiston Respublikasi MJtKning 99-moddasi 7-qismida nazarda tutilgan maʼmuriy huquqbuzarliklar sodir etilganligi sababli MCHJ rahbariga sud organlari tomonidan jazo chorasi bilan bog‘liq qaror chiqarilgan. Xususan, mazkur masala yuzasidan Toshkent shahar Qurilish Bosh boshqarmasiga va O‘zbekiston Respublikasi Iqtisodiyot va moliya vazirligi huzuridagi Kadastr agentligi Toshkent shahar boshqarmasiga xatlar jo‘natilgan.

Shuningdek, 2024 yilning 12 iyulida ushbu obyektga tekshiruv o‘tkazish maqsadida chiqilganida qurilish ishlari to‘xtatilganligi aniqlangan va qurilishga javobgar mansabdor shaxslar joyiga yetib kelmaganligi sababli xolislar ishtirokida dalolatnoma tuzilgan.

2024 yil 5 noyabrda yana monitoring o‘tkazilgan hamda holat yuzasidan "ERAM QURILISH" MCHJga yozma ko‘rsatma yuborilgan. Hozirgi kunda inspeksiya mazkur holat bo‘yicha sud organlariga tegishli tartibda chora ko‘rilishi yuzasidan daʼvo arizasi kiritmoqda.

Quruvchi tashkilot va fuqarolar (subinvestor) o‘rtasida tuzilgan shartnoma shartlari bajarilishini nazorat qilish hududiy inspeksiya vakolatiga kirmaydi va mazkur qurilish obyekti inspeksiya ro‘yxatidan o‘tmaganligi sababli uyning kadastr hujjatlarini rasmiylashtirib berilishi tadbirkor "ERAM QURILISH" MCHJning majburiyatidir.