Ziplayn va kanatli parklar yaratish xarajatlari qisman qoplanadi

Ziplaynlar va kanatli parklar (tayparklar) yaratishda tadbirkorlar xarajatlarni qoplash uchun subsidiya olishi mumkin bo‘ladi. Bu haqda Vazirlar mahkamasining 19 iyundagi qarorida aytilgan.

Vaqtinchalik nizomga ko‘ra, tog‘li va cho‘l hududlarida 38 ta tuman va shaharlarda tadbirkorlar ushbu ekstremal turizm majmualari va po‘lat kanat orqali yuqori tezlikda pastga tushadigan attraksionlarni qurish uchun subsidiyalar olishi mumkin:

• uzunligi kamida 200 metr bo‘lgan ziplayn — 100 million so‘mgacha;

• 150 kv.m dan ortiq maydonli taypark — 80 million so‘mgacha.

Nizom 2025 yil 1 iyuldan 2027 yil 1 yanvargacha amal qiladi.

Subsidiyalar obyektlar foydalanishga topshirilgandan so‘ng Turizm qo‘mitasi huzuridagi Turizmni qo‘llab-quvvatlash jamg‘armasi mablag‘lari hisobidan ajratiladi.

Mazkur qo‘llab-quvvatlash chekka hududlarda turizmni rivojlantirish, investitsiyalarni jalb etish, faol dam olish turlarini kengaytirish va yangi ish o‘rinlari yaratishga qaratilgan.

Majmualarni yaratish xarajatlarining bir qismini qoplash to‘g‘risidagi arizalar Turizm qo‘mitasi tomonidan ko‘rib chiqiladi.

Subsidiya olish uchun ariza berish paytida tadbirkor quyidagi holatlarda bo‘lmasligi kerak:

• qayta tashkil etish yoki tugatish jarayonida bo‘lish;

• sud qarori asosida to‘lovga layoqatsiz bo‘lish;

• shuningdek, uning faoliyati vaqtincha to‘xtatilgan bo‘lmasligi kerak.

Arizaga bir qator hujjatlar ilova qilinishi kerak:

• ekstremal turizm majmualari tashkil etilgan yer uchastkasiga bo‘lgan huquqni tasdiqlovchi hujjat nusxasi;

• xizmatlar uchun loyiha-smeta hujjatlarining nusxasi;

• ziplayn va tayparkning bitkazilgan qurilishini foydalanishga qabul qilish to‘g‘risidagi belgilangan tartibda tasdiqlangan qabul komissiyasi hisobotining nusxasi;

• obyektlarni ishga tushirish va xizmatlaridan foydalanish uchun Vazirlar mahkamasi huzuridagi Sanoat, radiatsiya va yadro xavfsizligi qo‘mitasining ruxsati.

Arizalarni ko‘rib chiqish muddati — 10 ish kuni. Agar qo‘shimcha o‘rganish kerak bo‘lsa, muddat yana 10 kunga uzaytiriladi. Maʼqullansa, mablag‘lar 10 kun ichida tadbirkorning hisobraqamiga o‘tkaziladi.

Ariza rad etilgan taqdirda, tadbirkor 14 ish kuni ichida izohlarni tuzatgan holda arizani qayta topshirishi mumkin. Qayta ko‘rib chiqish 7 kungacha davom etadi.