BMT Bosh kotibi Sumidagi hujumdan so'ng o't ochishni to'xtatishga chaqirdi

BMT Bosh kotibi Antoniu Guterrish Rossiya armiyasining Sumi shahriga uyushtirgan hujumini keskin qoraladi. Bu hujum 34 kishining hayotiga zomin bo‘ldi. Guterrish 14-aprel, dushanba kuni X ijtimoiy tarmog'idagi sahifasida Ukraina bo‘yicha o‘z fikrini bildirdi va mamlakatda sulh o‘rnatishga chaqirdi.

Guterrish Ukrainaga hududiy yaxlitlik bo‘yicha qo‘llab-quvvatlashini bildirdi

“Yakshanba kuni Rossiyaning Sumi shahriga qilgan raketa hujumi meni chuqur xavotirga soldi. Bu hujumlar tinch aholiga qaratilgan bo‘lib, xalqaro huquqqa zid va zudlik bilan to‘xtatilishi lozim”, — deb yozdi Guterrish.

“Men yana bir bor uzoq muddatli o‘t ochishni to‘xtatishga chaqiraman va BMT tomonidan adolatli, barqaror va har tomonlama tinchlikka erishish yo‘lida qilinayotgan maqsadli sa’y-harakatlarni qo‘llab-quvvatlashimni bildiraman. Bu tinchlik Ukraina suvereniteti, mustaqilligi va hududiy yaxlitligini to‘liq qo‘llab-quvvatlashi kerak”, — deya qo‘shimcha qildi u.

Sumiga uyushtirilgan raketa hujumi

Rossiya armiyasi 13-aprel, yakshanba kuni ertalab Sumi shahriga ballistik raketalar bilan hujum uyushtirdi. Hujum oqibatida 34 kishi halok bo‘ldi, ulardan ikkitasi bolalar. Yana 117 kishi jarohat oldi, jumladan 11 nafar bola. Bu hujum shu yil boshidan beri eng halokatlisi bo‘ldi.

Ukraina prezidenti Vladimir Zelenskiy bu hujumni qoralab, o‘sha kuni Masihning Quddusga kirishi (Verbnoe voskresenye) nishonlanayotganini, ko‘plab odamlar cherkovga yo‘l olganini eslatdi. Prezidentning so‘zlariga ko‘ra, 68 nafar jabrlanuvchi hozirda kasalxonalarda, ulardan 8 nafari og‘ir ahvolda.

Oliy Radaning “Xalq xizmatchisi” fraksiyasidan deputat Maryana Bezuglaya hujum vaqtida Sumida harbiylarni taqdirlash marosimi bo‘layotganini ma’lum qildi. Bu ma’lumotni Sumi viloyatidagi Konotop shahri meri Artem Seminixin ham tasdiqladi.