Isroil va "Hizbulloh" o‘t ochishni to‘xtatishga kelishib oldi

Isroil va Livanning "Hizbulloh" harakati Livanda o‘t ochishni to‘xtatish bo‘yicha kelishuvga erishdi. Bu haqda 26 noyabr, seshanba kuni AQSh prezidenti Jo Bayden ma’lum qildi, shundan so‘ng Isroil rasmiylari sulhga erishilganini e’lon qildi.

Amerika yetakchisiga ko‘ra, Isroil va "Hizbulloh" o‘rtasidagi sulh bitimi 27 noyabr kuni mahalliy vaqt bilan soat 04:00 da Isroil va Livanda kuchga kiradi. Shartnoma shartlariga ko‘ra, Isroil mudofaa kuchlari (SAHAL) bo‘linmalari kelasi 60 kun ichida Livan hududini tark etadi.

Vashington va Parij "o‘t ochishni to‘xtatish kelishuvi to‘liq bajarilishini" ta’minlashga harakat qiladi, deb ta’kidladi Reuters Fransiya va AQSh prezidentlarining qo‘shma bayonotiga tayanib.

Netanyahu Isroilning "harakat qilish huquqini" saqlab qoladi

Sulh haqidagi xabarlarni Isroil bosh vaziri Binyamin Netanyahu tasdiqladi. Isroil Xavfsizlik mahkamasining 11 a’zosidan 10 nafari Livan guruhi bilan bitim tuzish uchun ovoz berdi, deb yozdi siyosatchi X ijtimoiy tarmog‘ida.

Netanyahu AQShga "jarayonga qo‘shgan hissasi» uchun minnatdorchilik bildirdi, ammo Isroil "o‘z xavfsizligiga tahdid soladigan har qanday tahdidga qarshi harakat qilish huquqini» va "Hizbulloh" bilan o‘t ochishni to‘xtatish bo‘yicha kelishuvga "amal qilish erkinligini" saqlab qolishini aytdi. Kelishuv doirasida Isroil bosh vaziri, shuningdek, mamlakat fuqarolariga, agar "Hizbulloh" o‘zini qurollantirsa yoki chegara yaqinidagi infratuzilmasini tiklasa, Isroil Livanda jangovar harakatlarni davom ettirishiga va’da berdi.

AQSh Livan armiyasi bilan potensial qonunbuzarliklarning oldini olish uchun ishlaydi, dedi Reuters agentligining yuqori martabali manbasi. Vashington, shuningdek, Livan qurolli kuchlarini jihozlash, o‘qitish va moliyaviy yordam bilan ta’minlaydigan mintaqaviy harbiy-texnik qo‘mitaga qo‘shiladi.