Maduroning vorisi Trampni Venesuelaga qarshi sanksiyalarni bekor qilishga chaqirdi

Venesuela prezidenti vazifasini bajaruvchi Delsi Rodriges AQSh prezidenti Donald Trampni oʻz mamlakatiga qarshi sanksiyalarni bekor qilishga va Venesuela neftining blokadasini tugatishga chaqirdi. Bu haqda 27-fevral, juma kuni AFP agentligi Rodrigesning Venesuela davlat televideniyesidagi nutqiga tayanib xabar berdi.

Rodriges 2025-yil yanvar oyi boshida AQSh hukumati tomonidan Nikolas Maduro qoʻlga olinib, agʻdarilganiga qaramay, mamlakatlarni bir-biriga "doʻstona" deb bilishini taʼkidladi. U shuningdek, Karakas hukumati "AQSh bilan hamkorlikning yangi kun tartibini ochishga" intilayotganini va shuning uchun Vashington neft blokadasini tugatishi va Venesuelaga qarshi sanksiyalarni bekor qilishi kerakligini aytdi.

AQSh allaqachon Venesuelaga qarshi sanksiyalarni qisman yumshatgan.

Nikolas Maduro AQSh kuchlari tomonidan qoʻlga olingandan soʻng, Rodriges Vashington bilan hamkorlik qila boshladi. Venesuela hukumati siyosiy mahbuslar uchun amnistiya qonunini qabul qildi, hukumatga qarshi norozilik namoyishlarining ayrim ishtirokchilarini va Maduro rejimini qoʻllab-quvvatlashdan bosh tortgan sobiq amaldorlar va harbiy xizmatchilarni oqladi.

Rodriges shuningdek, mineral huquqlari toʻgʻrisidagi qonunlarda katta islohotlar oʻtkazdi va Venesuelaning neft sektorini xorijiy investitsiyalar uchun ochdi. Donald Tramp 24-fevral kuni oʻzining “Ittifoqning holati” mavzusidagi nutqida Qoʻshma Shtatlar Vashingtonning “yangi doʻsti va hamkori” Venesueladan taxminan 89 million barrel neft olganini eʼlon qildi.