Mark Karni Kanadaning yangi bosh vaziri bo'ladi

Angliya bankining sobiq gubernatori Mark Karni Kanadaning hukmron Liberal partiyasining yangi rahbari etib saylandi. 9-mart, yakshanba kuni bo‘lib o‘tgan ovoz berish natijalariga ko‘ra, u 86 foiz ovoz olib, sobiq moliya vaziri Kristia Friland, parlament palatasida hukumat yetakchisi Karina Gould va tadbirkor Frenk Baylisni ortda qoldirdi. Karni yanvar oyida iste'foga chiqishini e'lon qilgan Jastin Tryudoning o'rniga bosh vazir lavozimini egallaydi.

Mark Karni qo‘shni davlat prezidenti Donald Tramp tomonidan importga 25 foizlik bojxona to‘lovlari kiritilishi va Amerika yetakchisining Kanada suverenitetiga da’volari fonida AQSh bilan savdoga qaramlikni kamaytirish uchun Yevropa va Osiyo bilan yaqin hamkorlikni yoqlaydi. Bundan tashqari, liberallarning yangi yetakchisi oʻrta sinf uchun soliqlarni kamaytirish, byurokratiyani qisqartirish va innovatsiyalar va investitsiyalarni faol ragʻbatlantirishni nazarda tutuvchi iqtisodiyotni tubdan isloh qilishni va'da qilmoqda, deya aniqlik kiritadi DPA agentligi.

Tryudoning iste'fosi AQSh bosimi ostida

Kanadaning amaldagi Bosh vaziri Jastin Tryudo Liberal partiya bilan xayrlashuv nutqida uning mamlakati endi Qo'shma Shtatlar tomonidan "ekzistensial muammo"ga duch kelayotganini aytdi.

Tryudo 6-yanvar kuni Kanada bosh vaziri va hukmron Liberal partiya rahbari lavozimidan iste’foga chiqishini e’lon qildi. "Bu mamlakat keyingi saylovlarda haqiqiy tanlovga loyiqdir va agar men ichki janglarga kirishishim kerak bo'lsa, men eng yaxshi variant bo'lmasligim ayon bo'ldi", dedi u o'z parlamenti 24-martgacha to'xtatilishini e'lon qilib.

Jastin Tryudo 12 yilga yaqin Liberal partiyani boshqargan va 2015-yilning noyabridan beri Kanada bosh vaziri lavozimida ishlab kelgan. So'nggi yillarda siyosatchining mashhurligi qator islohotlar, shuningdek, narxlarning ko'tarilishi, uy-joy inqirozi va migratsiya muammolari tufayli sezilarli darajada kamaydi.