Ozarbayjon, Qozog‘iston va Qirg‘iziston ham fuqarolarini Ukrainani tark etishga chaqirdi

Ozarbayjon, Qozog‘iston va Qirg‘izistonning Ukrainadagi elchixonalari Rossiyadan “kuchli o‘qqa tutish” tahdidi fonida o‘z fuqarolarini mamlakatni tark etishga chaqirgan murojaatlar bilan chiqdi.

Ozarbayjon elchixonasi fuqarolarni mahalliy hokimiyat ko‘rsatmalariga rioya qilishga, havo hujumi signali eshitilsa, xavfsiz joylarga boshpana olishga chaqirdi. Shuningdek, 21-22 noyabr kunlari Ozarbayjonning Kiyevdagi elchixonasida konsullik qabuli o‘tkazilmasligi xabar qilingan.

Qozog‘istonning Ukrainadagi elchixonasi ham o‘z fuqarolariga mamlakatni tark etishni tavsiya qildi. Diplomatlar Qozog‘iston fuqarolarini Ukrainadagi faol harbiy harakatlar sodir bo‘lgan hududlarga yaqin hududlarni tark etishlari yoki bu mamlakat hududini tark etishlari kerakligi haqida ogohlantirgan. Bunga sabab sifatida otishmalarning kuchaygani aytilmoqda.

Diplomatik missiyaning eslatishicha, Qozog‘iston fuqarolari Ukrainani tark etish uchun Polsha yoki Moldova orqali o‘tadigan yer usti transportidan foydalanishi, keyin esa u yerga samolyotda yetib borishi mumkin.

“Elchixona barcha fuqarolarni havo hujumi haqidagi ogohlantirishni e’tiborsiz qoldirmaslikka va zudlik bilan boshpana olishga, o‘z xavfsizlik choralariga rioya qilishga va rasmiy idoralarning tavsiyalariga amal qilishga chaqiradi”, deyiladi xabarda.

Qirg‘iziston diplomatik missiyasi ham Ukrainada istiqomat qilayotgan respublika fuqarolariga xavfsizlik choralarini kuchaytirish yoki mamlakatni tark etishni tavsiya qilgan.

“Qirg‘iziston Respublikasi Tashqi ishlar vazirligi respublika fuqarolariga shaxsiy xavfsizlik choralarini kuchaytirishni va zarurat tug‘ilganda vaziyat to‘liq barqarorlashgunga qadar Ukraina hududini tark etishni qat’iy tavsiya qiladi”, deyiladi elchixona xabarida.