Politico: Tramp Maskni Oq uydan bo‘shatadi

AQSh prezidenti Donald Tramp o‘z yordamchilari va vazirlariga yaqin kunlarda Ilon Mask boshqaruv bo‘yicha sherik lavozimini tark etadi, deb aytgan. Bu haqda Politico nashri xabar bermoqda.

Nashr manbalari ma’lum qilishicha, Tramp Maskdan va uning Hukumat samaradorligi departamenti (DOGE — Department of Government Efficiency initiative)ni tashkil etish tashabbusidan mamnun. Biroq manbalarning ta’kidlashicha, Tramp va Mask shunday xulosaga kelishganki, Mask o‘z biznesiga qaytishi va yordamchi rolni o‘z zimmasiga olishi vaqti yetib kelgan.

Ehtimol, Maskning «chekinishi» Tramp ma’muriyatidagi ayrim insayderlar va ko‘plab tashqi ittifoqdoshlar uning noaniq xulq-atvoriga nisbatan muhokamalar kuchaygan bir paytga to‘g‘ri keldi. Ular Maskni ortiqcha siyosiy vaznga ega inson sifatida ko‘ra boshlashgan. Bu, ayniqsa, Mask faol qo‘llab-quvvatlagan konservativ sudya Viskonsin Oliy sudidagi o‘rin uchun kurashda 10 foiz farq bilan mag‘lub bo‘lganidan so‘ng yaqqol namoyon bo‘ldi.

Nashrning bir manbasi ta’kidlashicha, Mask ehtimol o‘zining rasman bo‘lmasa-da, maslahatchi sifatidagi rolini saqlab qoladi va vaqt-vaqti bilan Oq uyda paydo bo‘lib turadi. Yana bir manbaning ogohlantirishicha, agar kimdir Mask Trampning orbitasidan butunlay yo‘qoladi, deb o‘ylasa adashadi.

Insayderlarning aytishicha, o‘tish davri, ehtimol, Maskning «maxsus davlat xizmatchisi» maqomidagi muddatining tugashi bilan mos keladi. Bu maqom uni ayrim etika va manfaatlar to‘qnashuvi qoidalaridan vaqtincha ozod qilgan edi. Kutilishicha, ushbu 130 kunlik davr may oxiri yoki iyun boshlarida tugaydi.

Tramp ma’muriyatidagi Mask tarafdorlari o‘tish vaqti kelganini ta’kidlashmoqda. Ularga ko‘ra, Mask hukumat idoralarida hali ham ko‘p narsani qisqartira oladi.

Biroq ko‘pchilik ta’kidlashicha, Mask — bu noaniq, nazorat qilib bo‘lmaydigan kuch bo‘lib, u o‘z rejalarini vazirlar kabinetining kotiblari va Syuzi Uayls boshchiligidagi Oq uy boshqaruv guruhiga har doim ham to‘liq yetkaza olmaydi. Ayniqsa, gap Maskning o‘z ijtimoiy tarmog‘i X (Twitter)dagi izohlariga borib taqaladi.

Nashr yozishicha, Tramp Maskning o‘tishini ma’muriyati bilan o‘tkazilgan bir yig‘ilishda muhokama qilgan. Biroq yaqin kunlarda Tramp jurnalistlar oldida chiqish qilib, Maskka qilgan ishlari uchun minnatdorlik bildirgan va uni «vatanparvar» hamda «mening do‘stim», deb atagan.

Tramp jurnalistlarga shunday degandi: «Payti kelib, Ilon o‘z kompaniyasiga qaytishni xohlaydi. Men uni imkon qadar uzoqroq ushlab turaman».

Biroq Trampga yaqin ko‘pchilik atrofidagilar Mask tez orada Tramp tomonidagi markaziy roldan chetlashishidan orom olayotganini va DOGE departamentining — dam olish kunlarida elektron pochta orqali federal xodimlardan o‘z faoliyati natijalarini qayta hisoblab chiqishni talab qilishdan tortib, Ebola profilaktikasi dasturlarini tasodifiy qisqartirishgacha — turli kutilmagan harakatlari nihoyat to‘xtashi mumkinligini his qilmoqdalar.

Bu orada Oq uy matbuot kotibi Kerolayn Livitt Politico nashri Ilon Maskning DOGE departamentini tark tishi to‘g‘risidagi xabarini «axlat» deb atadi.