Tayvandagi prezidentlik saylovlarida hukmron partiya nomzodi Lay Sinde g‘alaba qozondi
Tayvandagi prezidentlik saylovlarida hukmron Demokratik progressiv partiya nomzodi va amaldagi vitse-prezident Lay Sinde 41 foizga yaqin ovoz to'plab g‘alaba qozondi. Uning asosiy raqibi, qariyb 33 foiz ovoz olgan Tayvanning hukmron partiyasi – Gomindan nomzodi Xou Yui o'z mag‘lubiyatini tan oldi, deya xabar beradi Focus Taiwan. Uchinchi nomzod, Tayvan xalq partiyasi rahbari Ke Venje esa 26 foizga yaqin ovoz oldi.
Tayvanda saylovlar 13-yanvar, shanba kuni bo‘lib o‘tdi, saylov uchastkalari mahalliy vaqt bilan soat 16:00da (Toshkent vaqti bilan 13:00) yopildi, shundan so‘ng darhol ovozlarni sanash boshlandi.
Ma'lum qilinishicha, 64 yoshli Lay 20-may kuni yangi lavozimiga kirishadi. Vitse-prezident 52 yoshli Siau Bikxim bo'ladi, u avvalroq Tayvanning AQShdagi vakolatxonasini boshqargan.
Tayvanda qonun chiqaruvchi yuanga (parlament) ham saylovlar bo‘lib o‘tdi. Bir palatali parlamentdagi 113 oʻrinning 73 tasi toʻgʻridan-toʻgʻri bir mandatli saylov okruglari boʻyicha, 34 tasi partiyalar oʻrtasida mutanosib ravishda saylanadi, yana 6 ta oʻrin avstroneziyaning tub aholisi uchun ajratiladi.
Dastlabki ma’lumotlarga ko‘ra, parlamentning yangi chaqirig‘ida DPP 52 o'ringa, Gomindan - 51, TPP - 8 va mustaqil nomzod ham bitta mandatga ega bo‘ladi. Qolgan o‘rin uchun – Yangi Taypeydagi saylov okruglaridan biridan – DPP va Gomindan nomzodlari o‘rtasida kurash davom etmoqda, deb yozadi Focus Taiwan.
.png "YouTube UZREPORT TV")
