Vatikanda uchinchi urinishda ham yangi Rim papasi saylanmadi

Vatikandagi katolik cherkovi kardinallari yig‘ilishi uchinchi urinishda ham yangi Rim papasini saylay olmadi. Bu haqda ANSA xabar berdi.

Ma’lum qilinishicha, katolik cherkovining yangi rahbarini saylash maqsadida chaqirilgan konklav 7 may kunidan beri davom etmoqda. U aprel oyi oxirida oldingi papa Fransisk vafotidan keyin e’lon qilingan. Saylovlarda amaldagi 252 kardinaldan 133 nafari ishtirok etmoqda.

Qora tutun Rim papasi lavozimiga nomzodlarning hech biri ovozlarning uchdan ikki qismini to‘play olmaganini anglatadi va uchinchi urinishdan keyin ham qora tutun chiqarilgan.  Konklav yangi papa saylanmaguncha davom etadi, bu vaqtda kardinallarga tashqi dunyo bilan muloqot qilish taqiqlanadi.

Agentlikning aniqlik kiritishicha, ovoz berishning uch bosqichi bo‘lib o‘tgan. Bir kunda ular to‘rtta bo‘lishi kerak. Kardinallar tushlikka chiqib ketgan, ular kunning ikkinchi yarmida yana ovoz berish uchun yig‘ilishlari kerak. To‘rtinchi raund yakunida Sikstin kapellasining mo‘risidan yana tutun chiqariladi.

Birinchi kuni ovoz berishning bir turi o‘tkaziladi. Agar yangi pontifik saylanmagan bo‘lsa, keyingi kunlarda kuniga to‘rt marta ovoz beriladi. Har bir bosqich byulletenlarni pechda yoqish bilan yakunlanadi.

Konklavlar turlicha davom etadi. Masalan, 2013 yilda avvalgi Rim papasi Fransiskning saylanishi papalik tarixidagi eng tezkor saylovlardan biri bo‘lgan. Uni ikkinchi kuni beshinchi raundda saylashgan. Eng uzoq davom etgan konklav deyarli uch yil davom etgan (1268 yil noyabrdan 1271 yil sentyabrgacha), bu jarayonda uchta saylovchi vafot etgan.