WSJ: Tramp Rossiya aktivlarini Ukrainadagi loyihalarga yo'naltirmoqchi

AQSh prezidenti Donald Trampning ma'muriyati so'nggi haftalarda Yevropa rasmiylari bilan muhokama qilayotgan Ukraina tinchlik rejasini to'ldiruvchi hujjatlarda Rossiyaning Yevropa Ittifoqidagi aktivlarini muzlatishdan chiqarish va ularni Ukrainadagi loyihalarni rivojlantirish uchun Amerika moliyaviy va boshqa kompaniyalariga o'tkazish taklif qilingan. Bu haqda 10-dekabr, chorshanba kuni The Wall Street Journal nashri noma'lum Amerika va Yevropa manbalariga tayanib xabar berdi.

Hujjatlarga ko'ra, loyihalardan biri Ukrainada hozirda Rossiya tomonidan nazorat qilinadigan Zaporijjya atom elektr stansiyasidan elektr energiyasi bilan ishlaydigan yangi yirik ma'lumotlar markazini qurish bo'ladi.

AQSh Rossiyaga global energetika bozoriga qaytishga yordam bermoqchi.

Trampning tinchlik rejasiga ilovalarda shuningdek, "Amerikaning Rossiya iqtisodiyotini inqirozdan chiqarish bo'yicha umumiy qarashlari" bayon etilgan. Bu AQSh kompaniyalarining Rossiya iqtisodiyotining strategik muhim sohalariga, masalan, noyob yer metallari konlarini o'zlashtirish va Arktikada neft burg'ulash kabi sohalarga investitsiyalarini nazarda tutadi. Bundan tashqari, AQSh Rossiyaga Yevropa va xalqaro energetika bozorlariga qaytishda yordam berishga tayyor.

Oq uy rejalari bilan tanish bo'lgan yevropalik amaldor Wall Street Journal nashriga bergan intervyusida bu hujjatlar unga Ikkinchi Jahon urushidan keyin Yevropani ta'sir doiralariga bo'lish bo'yicha g'olib kuchlar o'rtasida tuzilgan Yalta kelishuvlarini eslatayotganini aytdi.

Kreml matbuot kotibi Dmitriy Peskov Wall Street Journal gazetasining Vashingtonning Rossiyani global iqtisodiyotga qaytarish rejalari haqidagi xabariga izoh berar ekan, 11-dekabr kuni Moskva "xorijiy investitsiyalar oqimidan manfaatdor" ekanligini aytdi. "Rejalarga kelsak, biz hech qanday reja yoki loyihalarni ovoz chiqarib muhokama qilmayapmiz", deb xabar berdi RBC Peskovning so'zlaridan iqtibos keltirgan holda.