Zelenskiy: AQShda Ukrainadagi urush haqidagi Rossiya qarashlari ustunlik qilmoqda

AQSh siyosiy rahbariyati Ukrainadagi urush voqealarining ruscha talqiniga quloq tutmoqda. Bu haqda Volodimir Zelenskiy 13 aprel, yakshanba kuni chop etilgan Amerikaning CBS telekanaliga bergan intervyusida aytib o‘tdi.

«Menimcha, afsuski, AQShda ruscha fikrlar ustunlik qilyapti, - dedi Ukraina prezidenti. - Qanday qilib bizning qurbonlar va azob-uqubatlarimizga guvohi bo‘la turib, ruslar nima qilayotganini tushuna turib, shu bilan birga, ular tajovuzkor emasligiga, ular bu urushni boshlamaganiga ishonish mumkin? Bu Rossiyaning axborot siyosatining Amerikaga, AQSh siyosatiga va Amerika siyosatchilariga ulkan ta’siridan dalolat beradi».

«Prezident Tramp kuchli davlatning kuchli prezidenti sifatida Ukraina tomonida bo‘lishi kerak, - dedi Zelenskiy. - Menimcha, Amerika betaraf bo‘lishni xohlayotgani noto‘g‘ri».

Ukraina prezidenti Donald Trampga mamlakatga tashrif buyurish taklifini tasdiqladi. «Keling, odamlarga, tinch aholiga, askarlar, bolalarga, vayron qilingan kasalxonalar va cherkovlarga qarang», dedi u.

U amerikalik jurnalistlar bilan birgalikda yaqinda Rossiya raketa zarbasi oqibatida 20 kishi, jumladan to‘qqiz nafar bola halok bo‘lgan Kriviy Rixdagi bolalar o‘yingohiga tashrif buyurdi. Suhbatning o‘zi shahar maktablaridan biridagi bombalardan himoyalovchi boshpanada bo‘lib o‘tdi, u yerda darslar uchun sinf xonasi tashkil etilgan.

Zelenskiyning so‘zlariga ko‘ra, Kriviy Rixga hujum «Rossiyaga ishona olmasligimizni anglatadi». «Bu Rossiya bilan olib borilayotgan muzokaralarga ishona olmasligimizni anglatadi», — dedi u.

«Xalqimiz mumkin bo‘lgan eng yuqori narxni to‘lamoqda, - deb davom etdi Ukraina prezidenti. - Bundan ortiq narx yo‘q. Biz bor pulimizni berdik - moliyaviy jihatdan bor narsamizni. Lekin eng muhimi, biz odamlarimizning hayotini berdik».

Zelenskiyning ishonchi komilki, Vladimir Putin nafaqat Ukrainani, balki boshqa davlatlarni ham egallab olmoqchi. «Qat’iy turmasak, u uzoqqa boradi, - dedi u. - Bu shunchaki bo‘sh taxmin emas, tahdid haqiqiy. Putinning yakuniy maqsadi - Rossiya imperiyasini tiklash va NATO himoyasi ostidagi hududlarni qaytarib olish. Bularning barchasini inobatga olgan holda, bu jahon urushiga aylanib ketishi mumkinligiga ishonaman».