Oliy darajadagi uchrashuv natijalari ikki tomonlama hujjatlar bilan mustahkamlandi
Shavkat Mirziyoyev va Rejep Tayyip Erdogʻan Anqara shahrida boʻlib oʻtgan muzokaralar yakunida Biznesni qoʻllab-quvvatlash boʻyicha yuqori darajadagi kengashni taʼsis etish toʻgʻrisidagi bitimni imzolashdi.
Bundan tashqari, koʻp qirrali va uzoq muddatli sheriklikning turli yoʻnalishlarini qamrab oluvchi ikki tomonlama hujjatlar toʻplami imzolandi. Xususan:
– Imtiyozli savdo bitimi doirasida tovarlar roʻyxatini kengaytirish toʻgʻrisidagi bayonnoma;
– Ijtimoiy taʼminot toʻgʻrisidagi hukumatlararo bitim va uni amalga oshirish boʻyicha maʼmuriy bitim;
– 2022-yil 29-martda imzolangan davlat chegaralari orqali tovarlar va transport vositalarining oʻtishi haqida oldindan axborot almashish toʻgʻrisidagi bayonnomaga oʻzgartirishlar kiritish toʻgʻrisidagi qoʻshimcha bayonnoma.
Imzolangan hujjatlar savdo-iqtisodiy hamkorlikni yanada kengaytirish, ishbilarmon doiralar uchun qulay shart-sharoitlar yaratish hamda ikki mamlakat fuqarolarining ijtimoiy huquqlarini samarali himoya qilishga qaratilgan.
.png "YouTube UZREPORT TV")
