Toshkentda Kanada Viza markazi ochilishi mumkin
O'zbekiston va Kanada bu masalani o'rganishmoqda
2022-yil 31-may kuni O‘zbekiston Respublikasi tashqi ishlar vaziri v.b. Vladimir Norov Kanadaning mamlakatimizdagi Favqulodda va Muxtor elchisi Elison Meri Leklerni qabul qildi.
Kanada Elchisi O'zbekistonda davlat va jamiyat hayotining turli sohalarida amalga oshirilayotgan ulkan o'zgarishlarni yuksak baholadi. Dunyodagi murakkab vaziyatiga qaramay O'zbekiston islohotlar yo'lidan izchil harakatlanishda davom etayotgani e’tirof etildi. Kanada Hukumati O'zbekistonga bu yo'nalishda ko'mak berishga tayyorligi aytib o’tildi.
E.M.Leklerning fikricha, savdo-iqtisodiy va investitsiyaviy jabhalarda aloqalarni jadallashtirish uchun qator imkoniyatlar mavjud. O'zbekiston Kanada biznesi uchun istiqbolli yo'nalish hisoblanib, mazkur mamlakat kompaniyalari respublikadagi xususiylashtirish jarayonlarida, ish o'rinlari yaratishda, "yashil texnologiyalar"ni rivojlantirishda faol ishtirok etishni rejalashtirmoqda.
Shuningdek, uchrashuvda ta'lim sohasidagi aloqalarni kengaytirish masalalari muhokama qilindi. Tomonlar O'zbekistonda Kanadaning yetakchi oliy o'quv yurtlarining filiallarini ochish, iqtisodiyotning turli sohalarida birgalikda kadrlar tayyorlash masalasini ko'rib chiqishga tayyorligini bildirdilar.
O'zaro hamkorlikni chuqurlashtirish maqsadida Toshkent shahrida Kanada Viza markazini ochish masalasini o'rganishga kelishib oldilar.
.png "YouTube UZREPORT TV")
