Timur Kapadze: Mundialga oz vaqt qoldi, munosib tayyorgarlik koʻrishimiz kerak

Oʻzbekiston milliy terma jamoasi bosh murabbiyi Timur Kapadze va futbolchimiz Azizbek Turg‘unboyev O‘monga qarshi uchrashuv oldidan matbuot anjumanida ishtirok etdi.

Timur Kapadze:

— Musobaqaga tayyorgarlik yaxshi ketmoqda, barcha futbolchilar optimal holatda. Legionerlarimiz asta-sekin yigʻinga qoʻshilmoqda. Bu turnir biz uchun foydali boʻladi, bor e’tiborimizni musobaqaga qaratganmiz. Vatan jamoasi bitta – unga hammamiz muxlislik qilamiz. Mundialga oz vaqt qoldi, munosib tayyorgarlik koʻrishimiz kerak.

Soʻnggi yillarda futbolimiz rivoji uchun barcha sharoitlar yaratilmoqda, islohotlar davom etmoqda. Masharipov va Ashurmatov biz uchun jiddiy yoʻqotish. Ba’zi futbolchilar klublarida oʻyin oʻtkazib keyinroq yigʻinga qoʻshilyapti, taktik va jismoniy tayyorgarlik uchun vaqt kam, lekin bu tabiiy jarayon. Biroq bubholat boshqa futbolchilarga o‘zini ko‘rsatish uchun imkoniyat yaratadi.

Har bir raqib jamoaga yangi murabbiy tayinlangach, ularga qarshi oʻynash qiyin boʻladi. O‘monning so‘nggi oʻyinlarini kuzatdik – hozir ular boshqa uslubda harakat qilishmoqda. Keyrush tajribali mutaxassis, yangi jamoa shakllantirmoqda. Nima yuz berishini ertangi oʻyinda koʻramiz.

Biz esa oʻz rejalarimiz asosida turli uslublarni sinab koʻramiz va zarur natijani qoʻlga kiritishga harakat qilamiz.

Azizbek Turgʻunboyev:

— Yaxshi kayfiyatda yigʻinga keldik, mashgʻulotlar ham, tayyorgarlik jarayoni ham samarali oʻtmoqda. Oldimizda muhim oʻyinlar turibdi.

Muxlislarni stadionga taklif qilamiz. CAFA musobaqasi haqiqiy futbol bayrami boʻladi. Jamoamizni qoʻllab-quvvatlash uchun muxlislarimizni ertangi oʻyinda biz bilan birga boʻlishga chaqiramiz.