O‘zbekistonda 2025 yil 1-choragida davlat budjetiga qancha tushum bo‘lgani ochiqlandi

AOKAda Soliq qo‘mitasi rahbariyati ishtirokidagi matbuot anjumanida 2024 yildagi yakunlari: natija va kelgusi rejalar yuzasidan maʼlumot berildi.

2025 yil 1-choragida davlat budjetiga belgilangan 45,5 trln so‘m o‘rniga 48,2 trln so‘m tushumlar taʼminlandi.

2024 yilda O‘zbekiston iqtisodiyoti jadal rivojlanib, yalpi ichki mahsulot (YAIM) 6,5%ga o‘sdi. Ushbu makroiqtisodiy barqarorlik davlat budjeti daromadlarini shakllantirishda zamin yaratdi. 

Natijada 2024 yilda soliq siyosatini hamda soliq maʼmurchiligini yaxshilash evaziga davlat budjetiga tasdiqlangan prognoz 196,5 trln.so‘m o‘rniga 199,5 trln.so‘m tushishiga erishildi. 

2024 yilda sohalarga biriktirilgan soliq inspektorlari tomonidan soliq hisobotlarini tahlil qilish va tafovutlarni bartaraf etish hisobiga 486,3 mlrd so‘m qo‘shimcha soliq hisoblanib shundan 418,7 mlrd so‘m undirildi.

64,5 mingta vaqtincha moliyaviy qiyinchilikka duch kelgan tadbirkorlik subyektlari bilan alohida ishlab, muammolarini hal etilishida yordam berilishi natijasida ularning faoliyati qayta tiklandi.

129,3 mingta yangi dehqon xo‘jaligi ro‘yxatdan o‘tkazildi.

8,7 mingta o‘zini o‘zi band qilganlar o‘z faoliyatini kengaytirib YATTga, 947 nafar YATTning faoliyati esa yuridik shaxs sifatida yiriklashtirildi.

Joriy yil boshiga nisbatan mahallalar kesimida kichik tadbirkorlar hisobiga 41,4 mingta ishchi soni oshishiga erishilgan bo‘lsa, ularning tovar aylanmasi oldingi yilning mos davriga nisbatan 22 817,8 mlrd.so‘mga oshdi.

Shuningdek, sohada raqamlashtirish jarayonlarini izchil davom ettirish, soliq nazoratida “inson omili”ni cheklash hamda iqtisodiyotda xufiyona aylanma ulushini qisqartirish, qolaversa isteʼmolchilar huquqlarini himoya qilish maqsadida raqamli markirovkalash tizimi joriy etilgan.

“Raqamli markirovka” tizimida ro‘yxatdan o‘tgan 3,5 ming subyektlar tomonidan 2024 yilda 100 mingdan ortiq mahsulot turi “raqamli markirovka” katalogiga kiritilgan, shundan qariyb 8,2 mlrd. dona markirovkalangan tovarlar ishlab chiqarildi.

Idoralararo hamkorlik doirasida o‘zaro elektron axborot almashish yo‘lga qo‘yilgan vazirlik va tashkilotlar soni 60 taga, integratsiya yo‘nalishlari soni 238 taga yetkazildi. 201 ta marketpleyslar ro‘yxatga olindi.