2025-yilda tadbirkorlar uchun qanday yangilik va imtiyozlar belgilanmoqda?

AOKAda Biznes-ombudsman devoni rahbariyati ishtirokida o‘tkazilgan matbuot anjumanida O‘zbekistonda tadbirkorlikni qo‘llab-quvvatlash va huquqlarini himoya qilish borasidagi qonunchilikdagi o‘zgarishlar va amalga oshirilayotgan ishlar haqida maʼlumot berildi:

O‘zbekiston Respublikasi Prezidenti tomonidan qabul qilingan "Tadbirkorlar huquqlari va qonuniy manfaatlarini ishonchli himoya qilish chora-tadbirlari to‘g‘risida"gi PF-184-son Farmoni tadbirkorlarning ishonchli faoliyat yuritishi uchun yana-da keng imkoniyatlar yaratmoqda.

Farmon bilan quyidagi muhim o‘zgarishlar kiritilmoqda:

2025-yil 1-yanvardan: 

Jismoniy shaxs tomonidan tadbirkorlik faoliyatini yakka tartibdagi tadbirkor sifatida davlat ro‘yxatidan o‘tmasdan amalga oshirganlik uchun moliyaviy jarima bekor qilinadi;

Fiskal belgilarni aks ettirish tartibini buzish, majburiy raqamli markirovkalash qoidalarini buzish va xodimlar sonini yashirish kabi huquqbuzarliklar uchun maʼmuriy javobgarlik bekor qilinadi.

2025-yil 1-martdan:

Sudda ish yuritish taraflar kelishuv bitimi tuzganligi sababli tugatilganda, tadbirkorlik subyektlari va fuqarolarga davlat bojining bir qismi qaytarib beriladi.

Nazorat qiluvchi organlar faoliyati takomillashtiriladi:

Tadbirkorlik subyektlari faoliyatini nazorat qilishga vakolatli organlar va ularning nazorat sohalari ro‘yxati tasdiqlandi;

"Xavfni tahlil qilish" elektron tizimi joriy etiladi va tekshiruvlar xavf darajasiga qarab o‘tkaziladi;

Barcha tekshiruvlar "Yagona davlat nazorati" axborot tizimida ro‘yxatga olish orqali Biznes-ombudsmanni xabardor etish tartibida amalga oshiriladi.

Nazorat qiluvchi organlar xodimlarining malakasi oshiriladi:

Tekshirish huquqini beruvchi maxsus guvohnomaga ega xodimlar har ikki yilda Biznes-ombudsman tomonidan tashkil etiladigan o‘quv kurslarida malakasini oshiradi.

Nazorat qiluvchi organlar faoliyati baholanadi:

Biznes-ombudsman har yili nazorat qiluvchi organlar faoliyatini baholab, ularning reytingini eʼlon qilib boradi.