Jo‘rabek Mirzamahmudov: Elektr energiyasini cheklovlarsiz yetkazib berish bo‘yicha topshiriq berildi

O‘zbekiston energetika vaziri Jo‘rabek Mirzamahmudov 15-noyabr kuni prezident huzurida aholi va iqtisodiyotni energiya bilan taʼminlash masalalariga bag‘ishlangan yig‘ilish yakunlariga izoh berdi.

Uning so‘zlariga ko‘ra, davlat rahbari mutasaddilarga cheklovlarsiz uzluksiz elektr taʼminotini taʼminlash bo‘yicha topshiriq bergan. Shu bilan birga, barcha energetika quvvatlarini ishga tushirib, qo‘shni davlatlar energetika tizimlari bilan elektr energiyasi tovar aylanmasini taʼminlash vazifasi qo‘yildi.

"2024-yilning noyabr oyi o‘tgan noyabrga nisbatan salqinroq bo‘lib, qor yog‘ib, harorat -3 darajagacha, ayrim hududlarda -8 darajagacha pasaygan. Bu tabiiy gaz va elektr energiyasi isteʼmolini keskin oshirdi. Ushbu [isteʼmol] rejimlarini taʼminlash uchun zarur zaxira resurslari jalb qilindi. Gaz omborlarida yetarli hajmda gaz to‘planishi hisobiga gaz bilan taʼminlandi. Aholi uchun ham, iqtisodiyot tarmoqlari uchun ham uzluksiz yetkazib berish taʼminlandi" — dedi u "O‘zbekiston 24" telekanaliga bergan intervyusida.

Mirzamahmudov, shuningdek, harorat -10, -20 darajagacha pasayganda oylar va tumanlar kesimida harakatlar rejasi tayyorlangani, shuningdek, masʼul organlarning vazifalari — qazib olish, magistral tarmoqlar, tashish va har bir stansiyaning ishigacha belgilanganini maʼlum qildi.

"Bu masalalar bo‘yicha ham masʼuliyat, ham majburiyatlar belgilangan" — dedi u.

Avvalroq, energetika vaziri kuz-qish mavsumiga tayyorgarlik doirasida bazaviy va pessimistik ssenariylar ishlab chiqilganini maʼlum qilgan edi. Kritik vaqtlarda, -20 darajadan yuqori haroratda yirik isteʼmolchilar va yoqilg‘i quyish shoxobchalari uchun gaz yetkazib berish cheklanadi, mazutdan foydalanish ko‘paytiriladi, yirik korxonalarga energiya resurslari yetkazib berish cheklanadi va boshqalar.

Soliq qo‘mitasi raisining birinchi o‘rinbosari Mubin Mirzayevning aytishicha, yig‘ilishda soliq organlariga ishlab chiqarishdan isteʼmolgacha bo‘lgan zanjirning barcha bosqichlarida gaz hisobini taʼminlash bo‘yicha topshiriq berilgan.

Xususan, ishlab chiqarish va tashish korxonalarida o‘rnatilgan barcha hisoblagichlarni soliq organlari tizimlari bilan to‘liq integratsiya qilish rejalashtirilgan.

"Elektron hisoblagichlarning elektron hisob-fakturalar bilan o‘zaro bog‘liqligini taʼminlash, hisob-kitoblar bo‘yicha shaffof va avtomatik tizim yaratish bo‘yicha topshiriq berildi. Biz hozir ishlab chiqaruvchilar, UzGasTrade, „O‘ztransgaz,“ „Hududgaztaʼminot“ korxonalari bilan ishlayapmiz, integratsiyani boshladik. Bizda deyarli barcha hisoblagichlarning 98 foizi ko‘rsata boshladi. Biz to‘liq avtomatlashtirilgan hisobga olish tizimini yaratamiz", — dedi u.