Mahalla raislarining vakolat muddati uch yildan besh yilga o‘zgartirilishi mumkin

Oliy Majlis Qonunchilik palatasidagi O‘zbekiston Ekologik partiyasi fraksiyasining navbatdagi yig‘ilishi bo‘lib o‘tdi. Yig‘ilishda dastlab “Donorlik harakatini qo‘llab-quvvatlash tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi birinchi o‘qishda ko‘rib chiqildi.

Taʼkidlanganidek, mazkur qonun loyihasida “O‘zbekiston Respublikasi faxriy donori” ko‘krak nishoni bilan taqdirlangan shaxslarga ular uchun qulay bo‘lgan vaqtda har yilgi mehnat taʼtiliga chiqish, shahar jamoat transportining barcha turlaridan (yo‘nalishi va yo‘nalishsiz taksilardan tashqari) bepul foydalanish, sanatoriy-kurortlarda davolanish uchun yo‘llanmalarni navbatsiz olish huquqini beri masalalari ko‘zda tutilmoqda.

Fraksiya aʼzolari loyiha haqida fikr bildirar ekan, uning qabul qilinishi tibbiyot sohasida qon zaxiralari va beg‘araz donorlar sonining ortishiga, bu o‘z navbatida, soha rivojiga xizmat qilishini qayd etdi.

Shuningdek, yig‘ilishda fuqarolar yig‘inlari raislari saylovini tashkil etish va o‘tkazish tartibini yana-da takomillashtirish, bo‘shab qolgan o‘rinlarga saylangan fuqarolar yig‘inlari raislari faoliyatlarining kafolatlarini mustahkamlashga qaratilgan qonun loyihasi birinchi o‘qishda ko‘rib chiqildi.

Bir guruh deputatlar tomonidan ishlab chiqilgan ushbu loyiha bilan fuqarolar yig‘ini raisining vakolatlari muddatini uch yildan besh yilga o‘zgartirish, shuningdek, fuqarolar yig‘ini raisi vakolatlari muddatidan ilgari tugatilgan taqdirda bo‘shab qolgan o‘rinlarga saylov o‘tkazish orqali saylangan yangi fuqarolar yig‘ini raisining ham vakolat muddatini besh yil etib belgilash taklif etilmoqda.

Qonun loyihasi bo‘yicha fraksiya aʼzolari bir qator taklif va tavsiyalar bildirib, uni maʼqulladi.