O‘zbekiston Bolalarga nisbatan zo‘ravonlikka chek qo‘yish milliy majburiyatini qabul qildi

26 may kuni O‘zbekiston bolalarga nisbatan zo‘ravonlikka chek qo‘yish bo‘yicha milliy majburiyatni eʼlon qildi va bu boradagi global «Bogota harakatga chaqiruvi» tashabbusiga qo‘shildi, deb xabar berdi YUNISEFning mamlakatdagi matbuot xizmati.

Maʼruzada taʼkidlanishicha, mazkur qaror so‘nggi ikki yilda mamlakatda bolalarni himoya qilish sohasida amalga oshirilgan huquqiy va institutsional islohotlarning davomi bo‘ldi. 15 may kuni «Bolalarni zo‘ravonlikning barcha shakllaridan himoya qilish to‘g‘risida»gi qonunning kuchga kirishi ushbu islohotlarning asosiy bosqichi bo‘ldi.

Mamlakatda allaqachon bolalarga nisbatan zo‘ravonlikning oldini olish va unga qarshi kurashishga qaratilgan 2025−2035 yillarga mo‘ljallangan ko‘p tarmoqli strategiya va harakatlar rejasi ishlab chiqilmoqda.

O‘zbekiston, shuningdek, Markaziy Osiyo davlatlari elchilarini bolalarga nisbatan zo‘ravonlikka barham berish uchun hamkorlik qilishga chaqirdi.

«O‘zbekistonning kashshof davlat bo‘lishga intilishi — bolalar uchun haqiqiy o‘zgarishlar qilish istagi va masʼuliyatiga kuchli signal», — dedi UNICEF Ijrochi direktori Ketrin Rassel.

«Har bir bola zo‘ravonlikdan — uning har qanday ko‘rinishidan himoyalangan bo‘lishi kerak. Bu dunyoda „o‘zgalarning“ bolalari yo‘q — xuddi o‘zga bolalarning dardi bo‘lmaganidek. Biz barchani jajji yuraklarning katta dardiga eʼtibor berishga, bolalarni eshitish imkoniyatini berishga chaqiramiz. Ular gapirishga haqli», — dedi Ijtimoiy himoya milliy agentligi direktorining birinchi o‘rinbosari Shahnoza Mirziyoyeva.