“O'zmedimpeks” DMga nisbatan tegishli ta'sir chorasi qo'llanildi

Raqobat qo‘mitasi tomonidan “O'zmedimpeks” DM (hozirgi nomi “O‘zbekiston Respublikasi Sog‘liqni saqlash vazirligi huzuridagi Xaridlar markazi” DM) tomonidan “Kamera va yorug‘lik filtrlari bilan laboratoriya tadqiqoti o‘tkazish uchun tibbiy mikroskoplar” xarid qilish uchun o‘tkazilgan boshlang‘ich narxi 12,1 mlrd so‘mlik tender bo‘yicha o‘rganish ishlari amalga oshirildi.

O‘rganish davomida, Iqtisodiyot va moliya vazirligi huzuridagi “Loyihalar va import kontraktlarini kompleks ekspertiza qilish markazi” DUK (Markaz) tomonidan taqdim qilingan maʼlumotga asosan tender hujjatlari bo‘yicha Markaz tomonidan berilgan xulosadagi eʼtiroz va ko‘rsatmalar qisman inobatga olinganligi, tibbiy mikroskoplarning texnik ko‘rsatkichlari qo‘shimcha qabul qilinadigan diapazon yoki chegara parametrlari bilan to‘ldirilmasdan aniq parametr va talablar belgilanganligi sababli, ushbu xarid hujjatida “Olympus Corporation” (Yaponiya) ishlab chiqaruvchining tovariga bog‘langanlik belgilari mavjudligi aniqlandi.

Yuqoridagilarga asosan, Qo‘mita Maxsus komissiyasi tomonidan “Raqobat to‘g‘risida”gi Qonuni talablari buzilish alomatlari bilan “O'zmedimpeks” DM (hozirgi nomi “O‘zbekiston Respublikasi Sog‘liqni saqlash vazirligi huzuridagi Xaridlar markazi” DM) ga nisbatan ish qo‘zg‘atilib, natijasi yuzasidan tender savdolarini bekor qilish bo‘yicha qaror qabul qilindi. 

Shuningdek, qonunbuzilish holatini bartaraf etish va kelgusida yo‘l qo‘ymaslik to‘g‘risida ko‘rsatma berildi.

Maʼlumot o‘rnida. Maxsus komissiyaning ushbu qaroridan norozi bo‘lgan tomon Qo‘mitaning Apellyatsiya kengashiga yoki sudga murojaat qilish huquqiga ega.