Таълим кредити ажратишнинг янги тартиби тасдиқлади

Вазирлар Маҳкамасининг 16 сентябрда қабул қилинган қарори билан таълим кредити бериш тартибига ўзгартириш киритилди. Бу ҳақда “Таълим назорати” «Телеграм» канали хабар берди.

Ҳужжат билан, олий ва профессионал таълим ташкилотларида таҳсил олиш учун таълим кредити фақат кундузги таълим шаклида ўқиётган талаба ва ўқувчиларга ажратилади.

2024/2025 ўқув йилидан таълим кредити иккинчи ва ундан юқори босқич талабалари учун фанларни ўзлаштиришнинг ўртача кўрсаткичи (ГПА) «3» дан паст бўлса, тўлов-контракт суммасининг кўпи билан 80%и миқдорида ажратилади. Бунда кредит тўлов-контракт суммасининг дастлабки 20%и талаба томонидан тўлангандан кейин берилади.

Талаба баҳолари «3» ва ундан юқори ёки “Ижтимоий ҳимоя ягона реестри"га киритилган оила аъзоси бўлса, таълим кредити тўлов-контракт суммаси миқдорида ажратилади.

Талабанинг «ГПА» кўрсаткичи ва тегишли маълумотлари «ҲEМИС» ахборот тизими орқали олинади. Тўлов-контракт тўғрисидаги маълумотлари эса kontrakt.edu.uz ахборот тизими орқали автоматик тарзда шакллантирилади.

Таълим кредити олиш учун белгиланган тартибда Иқтисодиёт ва молия вазирлигининг расмий веб-сайтида эълон қилинган банкларга Ягона портал (my.gov.uz), “Таълим кредити” (talim-krediti.mf.uz) ахборот тизими ёки тўғридан- тўғри мурожаат қилиш мумкин.

Кредит олувчи томонидан таълим кредитини олиш учун тўғридан тўғри банкга мурожаат қилинганда, банк улар учун очилган “Таълим кредити” (talim-krediti.mf.uz) ахборот тизимидаги шахсий кабинет орқали таълим кредити олиш тўғрисидаги аризани шакллантиради.