Toyota Land Cruiser Prado 2018 йўлтанламас автосининг тақдимот маросими ўтказилди

Пойтахтимизда янгиланган Toyota Land Cruiser Prado 2018 йўлтанламас автосининг тақдимот маросими бўлиб ўтди. Янги кўринишдаги афсонавий автомобил намойишида автоихлосмандлар иштирок этишди.

 Бугун мамлакатимизда ривожланишнинг янги босқичи бошланди. Кўплаб ислоҳотлар, янги ғоялар ва лойиҳалар аниқ кўриниш олиб, республикамизнинг иқтисодиёти ҳамда ижтимоий ҳаёти ривожига ўз хиссасини қўшмоқда. Янги имкониятлардан илҳомланган юртимиз компаниялари эса халқаро майдонда дадил қадам ташлашаяпти. Улардан бири Technic Diesel Motors МЧЖ бўлиб, бугунги кунда компания ўз олдига мураккаб вазифани қўйди. Бу Ўзбекистон фуқаролари ҳамда дунёдаги энг йирик автомобил ишлаб чиқарувчилардан бири саналган Toyota ўртасида манфаатли бўғинга айланишдир. Бу ташаббуснинг яққол исботи сифатида 18 – ноябр куни Пойтахтимизда Япониянинг энг катта - Toyota корхонаси Ўзбекистонда илк расмий диллерлик марказини очди ва Toyota Land Cruiser Prado 2018 йўлтанламас автосининг тақдимот маросимини ўтказди. Таъкидланганидек, Technic Diesel Motors компанияси Toyota нинг Ўзбекистондаги биринчи расмий дилерига айланди. Ҳозирда у нафақат импорт қилинган машиналарни сотиш, балки техник хизматларни ҳам тақдим этиб, тўғридан-тўғри ишлаб чиқарувчи заводнинг ўзидан зарурий эҳтиёт қисмлари ва оригинал қўшимчаларни етказиб бериш билан ҳам шуғулланади. Бундан ташқари, Technic Diesel Motors орқали сотиб олинган барча япон маркали машиналарга 3 йиллик расмий кафолат ҳам берилади. Кўп сонли қизиқувчиларни ўз атрофига тўплаган тақдимотда янги Toyota Land Cruiser Prado 2018 йўлтанламас омма эътиборига хавола этилди. Маълум қилинишича, бу моделнинг бошқаларидан бир қатор фарқли жиҳатлари бор. Яъни машина юқори стандартдаги хавфсизлик ёстиқчалари, GXR уч эшик ва EXR беш эшик модули билан жиҳозланган. Вазиятга қараб Toyota Land Cruiser Prado 2018 нинг шиналари автоматлаштирилган назорат тизимига ўта олади. Унда олди ва орқа бампер, фаралар замонавий кўринишга келтирилган. Йўлтанламаснинг салон жиҳозлари ҳам сифатли ва бежирим безатилган бўлиб, у ҳақиқий япон сифатини ўзида мужассам этган. Унда шунингдек, микро иқлимни таъминловчи тизим ҳам мавжуд. Ойна ва эшиклар Ташқи шовқиндан максимал ҳимояланган.  

“Toyota” компаниясининг Марказий Осиё бўлими вакили Юсуке Мацумото:

Ишлаб чиқариш жараёнини бошқаришнинг ягона тизими, тозалик ва тартиб тамойилларига риоя қилиш, операциялар кетма-кетлиги аниқ олиб борилиши ва ишлаб чиқаришнинг ҳар бир босқичини қатъий назорат қилиш – бу Toyota русумида ишлаб чиқарилаётган автомобилларнинг бетакрор сифати кафолатидир. Олдинги моделлардан фарқли равишда янги йўлтанламаснинг ташқи кўриниши ўзгача дизайн билан янгиланган ва у қулайликдан бошқасини ваъда қилмайди. Биз Ўзбекистонга келганимиздан хурсандмиз. Ўйлайманки, автомобил харидоргир бўлади ва Ўзбек халқига кўп йиллар давомида сифатли хизмат қилади.  

Дархақиқат, аслида Toyota тақдимотга муҳтож эмас — бу дунёга машҳур автомобил маркаси бўлиб, сифат ва ишонч билан чамбарчас боғлиқдир. Айни пайтда Technic Diesel Motors МЧЖ мамлакатимиз бозорида ушбу бренднинг учта моделни тақдим этган. Булар Land Cruiser 200, Rav4 ва бутун дунёда орзиқиб кутган ва бугун Тошкентда тақдимоти ўтказилаётган янги модель - Land Cruiser Prado 2018  автолари.    

Автомобил тақдимот маросими давомида ушбу янги Land Cruiser Prado 2018 ни биринчилардан бўлиб Ўзбекистонда харид қилган харидор номи ҳам эълон қилинди ва машинанинг калити эгасига топширилди.  

 Яна шуни қўшича қилиш керакки, Technic Diesel Motors МЧЖ компаниясининг фаолият олиб бориши, шак-шубҳасиз, республикамиз ичида рақобатнинг ривожланиши учун янги босқични бошлаб Ўзбекистоннинг халқаро автомобилсозлик брендлари билан ҳамкорлик қилиш учун кенг имкониятларни очади.