Avstraliya Bosh vaziri qurol qonunlarini kuchaytirmoqchi

Avstraliya Bosh vaziri Entoni Albanese Sidneydagi Bondi plyajida yahudiy jamoasi a'zolariga qilingan hujumdan so'ng qurol qonunlarini kuchaytirishni taklif qildi. Bu haqda 15-dekabr, dushanba kuni AFP va Reuters xabar berishdi.

Albanese islohot taklifini 15-dekabr kuni tushdan keyin shtat bosh vazirlari bilan bo'lib o'tadigan Milliy Vazirlar Mahkamasi yig'ilishida muhokama qilish uchun taqdim etishini aytdi.

Bu shaxslar egalik qilishi mumkin bo'lgan qurollar sonini cheklash va vaqti-vaqti bilan litsenziyalarni qayta tekshirishni o'z ichiga oladi. "Odamlar vaqt o'tishi bilan radikallashishi mumkin. Litsenziyalar abadiy bo'lmasligi kerak", dedi bosh vazir.

Avstraliyada sodir bo'lgan otishmada kamida 15 kishi halok bo'ldi, 40 ga yaqin odam kasalxonaga yotqizildi.

14-dekabr kuni Sidneyning mashhur Bondi plyajida sodir bo'lgan otishmada yahudiylarning Hanukka bayrami boshlanishiga bag'ishlangan tadbirda kamida 15 ishtirokchi halok bo'ldi. Associated Press xabar berishicha, yana 38 kishi kasalxonalarda davolandi.

Shtat bosh vaziri Kris Minns otishma "Xanukkaning birinchi kunida Sidneyning yahudiy jamoasiga ataylab qaratilgan edi", dedi va hujumni terroristik harakat deb atadi.

Politsiyaning xabar berishicha, hujum qilganlikda gumon qilingan ikki kishidan biri o'ldirilgan, ikkinchisi esa og'ir yaralangan va hibsga olingan. Otishma uyushtirganlardan birini musulmon yo'ldan o'tgan odam qurolini tortib olgan holda jilovlagan. Isroil Bosh vaziri Benyamin Netanyaxu va boshqalar uni harakatlari uchun maqtashdi.