Eron oliy rahbari vafot etgan taqdirda uch nafar o‘rinbosari nomini aytdi

Eron oliy rahbari Ali Xominaiy agar AQSH yoki Isroil o‘zini o‘ldirsa, o‘rniga tayinlanadigan uch nafar nomzodni tanladi, deb yozdi The New York Times Erondagi manbasiga tayanib.

Qayd etilishicha, oliy rahbarni tayinlash uchun masʼul bo‘lgan Ekspertlar assambleyasiga vorisni tezkor tanlash bo‘yicha ko‘rsatma berilgan.

Nashrning yozishicha, Eronda yangi oliy rahbarni tayinlash jarayoni odatda bir necha oy davom etishi mumkin. Ammo hozir mamlakatda urush davom etar ekan, rasmiylarning aytishicha, Xominaiy hokimiyatni tezkor va tartibli topshirilishini taʼminlamoqchi.

Qayd qilinishicha, Xominaiyning o‘g‘li, ulamo va Islom inqilobi qo‘riqchilari korpusiga yaqin bo‘lgan Mo‘jtaba ro‘yxatda yo‘q, vaholanki aynan uning otasi o‘rniga asosiy daʼvogar ekani haqida mish-mishlar tarqalgan edi. Shu bilan birga, Xominaiy harbiy qo‘mondonlar o‘ldirilgan taqdirda ularning o‘rniga bir qancha nomzodlarni tanlagan.

Shu bilan birga, maqolada qayd etilishicha, Eron dastlabki zarbadan keyingi shok holatidan chiqib olgan va Isroilga kundalik qarshi hujumlar uyushtirish uchun safarbarlikni tiklagan.

Islohotchi siyosatchi va Eron sobiq vitse-prezidenti Muhammad Ali Abtahiy so‘zlariga ko‘ra, Isroil Eron jamiyatining urushga munosabatini to‘g‘ri hisoblay olmagan. Odatda bir-biriga qarama-qarshi bo‘lgan siyosiy guruhlar oliy rahbar atrofida to‘planib, mamlakatni tashqi tahdidlardan himoya qilishga bel bog‘lagan.

NYT manbalarining aytishicha, Eron rahbariyatini hozir uchta asosiy masala tashvishga solmoqda: Xominaiyga ehtimoliy suiqasd, AQSHning urushga qo‘shilishi va muhim infratuzilmaga misli ko‘rilmagan vayronkor hujumlar.

Eronda o‘lim qo‘rquvi shu qadar kuchliki, dedi rasmiylar, razvedka xizmati amaldorlar va harbiy qo‘mondonlarga mobil telefon va boshqa elektron aloqa vositalaridan foydalanishni taqiqlagan. Ularga yer ostida qolish buyurilgan.