Европа Мюнхен келишувининг такрорланишидан огоҳлантирмоқда

Болтиқбўйи давлатлари, Франция, Чехия, Буюк Британия ва Украина парламентларининг ташқи ишлар қўмиталари раислари 25 апрель куни қўшма баёнот чиқариб, Украина суверенитети ва ҳудудий яхлитлиги борасида муросага йўл қўймаслик зарурлигини таъкидлади.

Эстония парламенти расмий сайтида эълон қилинган ҳужжатда қўмиталар раҳбарлари Дональд Трамп ва АҚШ Конгрессини “Россия томонидан босқинчи давлат сифатидаги глобал таҳдид олдида ҳақиқий етакчиликни намойиш этишга” чақирган.

“Биз шантаж ва ёлғонга берилмасликни қатъий тавсия қиламиз”, дейилади баёнотда.

Шунингдек, баёнотда Украинанинг Европа Иттифоқи ва НАТОга кириш жараёнини тезлаштириш, Россиянинг музлатилган активларини Киев фойдасига мусодара қилиш, Россия Президенти Владимир Путин ва унинг “барча шериклари”ни ҳарбий жиноятлар учун шахсан жавобгарликка тортиш талаблари ҳам бор.

“Биз 1938 йилда Мюнхенда йўл қўйилган хатоларни такрорламаслигимиз керак. Ҳарбий жиноятчи Путин билан музокаралар бефойда: унинг асосий мақсади иттифоқчимиз АҚШни заифлаштириш ва шарманда қилишдир”, дейилади ҳужжатда.

Баёнотга Эстония, Латвия, Литва, Франция, Чехия, Украина ва Буюк Британия парламентларининг ташқи ишлар қўмитаси раислари ҳам қўшилди. Баёнотни Риигикогу ташқи ишлар қўмитаси раиси Марко Михкелсон имзолаган.

Маълумот учун, 1938 йил 30 сентябрда Мюнхенда Буюк Британия Бош вазири Невилл Чемберлен, Франция Бош вазири Эдуард Даладье, фашист Италия етакчиси Бенито Муссолини ва фашистлар Германияси етакчиси Адольф Гитлер томонидан имзоланган шартнома Судетнинг Германияга қўшиб олинишини таъминлади. 30 сентябргача ушбу минтақа тегишли бўлган Чехословакия имзолашга таклиф қилинмади. Бу келишув тарихга “Мюнхен келишуви” номи билан кирди.

Аксарият Ғарб тарихчилари инглиз ва француз сиёсатчилари бутун Европани қамраб оладиган урушдан қўрқиб, Гитлер Чехословакия ҳудудининг бир қисмини олганидан кейин тинчланишига умид қилиб, “юмшоқ сиёсат” олиб боришга ҳаракат қилган деган версияни илгари суради.